Shillong, Naitung 06: Haba pynpaw pyrthei ïa ka sap ïalehkai Karate ha rynsan ïakop jong ka lympung 9th South Asian Karate Championship, ka Kynjailin L Mawnai ka la ïoh ban khur ïa ka takma rnong na ka bynta ka ri India, la pyntip ka All Meghalaya Karate-Do Association [AMKA].
Kane ka Championship kaba lai sngi lynter ka la long ha Colombo, ha Sri Lanka bad ka la sdang naduh ka 04 tarik haduh ka 06 tarik Naitung, 2025, bad ka Kynjailin ka la ïoh ban mihkhmat ïa ka ri India da ka jingsngew sarong ban shimbynta ha ka kyrdan ïakhun U-21 Individual Kumite-50kg jong ki kynthei.
Ka jingshah jied jong ka Kynjailin ban don bynta ha ka kynhun India ka dei da kaba pynshong nongrim ïa ka jinglehkai ba seisoh jong ka hadien ba ka la khur takma ha ka Karate India Organisation (KIO) 4th Senior and U-21 National Karate Championship 2025, kaba la pynlong dang shen ha Gachibowli Indoor Stadium, Hyderabad. Ka dei tang maka marwei napdeng ki lai ngut ki nongïalehkai Karate jong ka Jylla Meghalaya ban jop takma ha kane ka Championship.
Ha u snem 2024 ka Kynjailin ka la khur takma na ka bynta ka Meghalaya ha ki lympung ïalehkai jong ka ri ha Guwahati bad Maharashtra bad kumjuh ruh ha Gujarat ha u bnai Nohprah, 2022.
