Shillong, ïaïong 03: Ka kynhun ki rang bad ki thei siat khnam ka Meghalaya ki la lah ban wanrah nam bad burom hadien ba ki la lah ban khur syndon da ka takma ksiar ha ka lympung ïalehkai jong ka Khelo India Tribal Games, ba la long ha Chhattisgarh.
Ka kyrwoh na ka synjuk ka Archery Association of Meghalaya ka pyntip ba ïa kine ki takma ksiar ka kynhun ki rang bad ki thei ïalehkai ka jylla ki la ioh ba kin khur ha ka kyrdan ïakhun ka Compound.
Haba phai sha ka jingïakhun ki khynnah kynthei, ka kynhun ka Meghalaya ki la lah ban pynliem ïa ka Nagaland , ïa kaba la mih madan da ka Nakibansharai Khonghat(East Khasi Hills), Kate Diamond Lyngdoh (East. Khasi Hills) bad ka Stracy M Sangma (South Garo hills).
Katba ha ka jingïakhun ki khynnah shynrang, ka kynhun ka la lah ba kan pynliem noh ïa ka Assam, ïa kaba la mih madan da u Donkupar L Shadap (Ri-Bhoi) Khelo India, u Phrangkupar Kharjahrin(Nongstoin) bad u Banwanbor Marwein (Nongstoin)Khelo India.
Ïa kane ka kynhun la ïalam da u Head Coach cum High Performance Director u Mim Bahadur Gurung, nangta u Nandkishore Compound Head Coach, u Jag Prasad Thapa Archery Coach bad kong Bansaralin Dhar Archery Coach ka jylla.
