Bengaluru, Ïaïong 30: Ka Preeti Gulia kawei na ki khun kynthei jong uwei u nongrep jong ka Bengaluru kaba mihkhmat ïa ka Maharshi Dayanand University ha ka Khelo India University Games 2021 kala khur ïa ka takma Ksiar kaba la pynurlong ïa ka jingthrang u kkpa jong ka.
Shwa ban leit ïakhun sha katei ka lympung u kpa jong ka Preeti Gulia u la pynpaw ha ka ba u kwah ba kan wanrah sha ïing ryngkat ka takma ksiar. “Khun sa ïalehkai bha bad sngewbha ban wanrah ryngkat ka takma ksiar mynta ka kynti.” ong u kpa jong ka Preeti Gulia.
Kumta da kaba pynliem ïa ka Unnati Sharma jong ka Lovely Professional University ha ka kyrdan ïakhun ba 63kg ha ka final jong ka jingïalehkai Judo ha ka sngi Thohdieng, ka Preeti ka dap da ka jingsngewkmen. “I pa i la ong hanga tang kane kawei, ïalehkai bha bad wanrah takma ksiar ha kane ka kynti ba mynta. Kadei lyngba kine ki kyntien jong ki pa kaba la ai mynsiem ïanga ha ka final.”
Ha ka jingïalehkai Khelo India University Games kaba lah dep ha KIIT, Odisha, ka Preeti kala jop takma rnong ha kajuh ka kyrdan ïakhun. “Tang ha ki 25 sngi, nga la rem ha ka Unnati ha ka All India University. Nga la rem hakhmat jong ka ha ka Junior Nationals ruh kumjuh. Kumta, ban jop pyrshah ïa ka ha kane ka Khelo India University Games kadei kaba kyrpang na bynta jong nga.”
Ka Preeti kaba dei na District Rohtak, Haryana, kam pat ïoh jingithuh ha ka liang ka imlang ka sahlang. Ha ka jingshisha dei kiba haïing hasem kiba la kyrshan ïa ka sap kaba don kum ka nongïalehkai Judo bad ka la kiew bha ha kane ka kam ïalehkai. “Nga don ka hynmen bad u para shynrang, hynrei kiba haïing ki kheiñ beit kum la ki khun lajong, bad kim ju khanglad ïa nga ban pynleit jingmut ha ka jingïalehkai Judo. Watla duna ha ka liang ka pla tyngkam kila pynthikna ba ngan ïoh lut baroh ki jingdonkam ban kylla long ka nongïalehkai Judo kaba tbit bad ngan aiti lut ïalade ban pynlong ka jingsngew sarong na bynta jong ki,” ong ka Preeti.
Kane ka jingjop kala pynlong ïa ka Preeti ban jop ruh ïa ki jingmynsaw ban khur ïa ka takma ksiar. “Nga la mynsaw ka khohsiew ha u 2017, bad ha u 2018 nga la shah puid. Ha ka jingïalehkai senior hala ka jong ka jylla kaba dang shu dep shen, nga la mynsaw biang ka khohsiew. Hynrei ngam kwah ban duh noh ïa kane ka lad ban ïalehkai bha ha ka KIUG 2021, kumta nga la teh skhem bha ïa ka khohsiew kumta mynta ka sngi ngam pat da lah bha ban pynkhun ïa ka khohsiew. Ngam ju pynsngap ïa kiei kiei kiba wan jia. Nga kwah beit ban jop,” ong ka Preeti.
Ka Preeti kala buh ka thong ban wanrah takma ruh ïa la ka ri ha kiwei pat ki jingïalehkai. “Nga kwah ban long ka lahduh ha kane ka kyrdan ïakhun bad ngan aiti lut met bad mynsiew ban kynjoh sha kane ka kyrdan. Haduh mynta, nga la ïashim bynta tang shisien ha ka jingïalehkai international bad kane kadei ha ka Commonwealth Championships. Ka thong nangne shakhmat ka long ban khur takma na bynta la ka ri India,” la ong ka Preeti.