SHILLONG, Risaw 17: Ka Meghalaya State Kickboxing Association (MSKA) ka la dap da ka jingsngew sarong kaba khraw na bynta ka samla Daniella I. Wanda Mylliemngap, ka thei ïalehkai Kickboxer kaba la wanrah nam ym tang ïa ka jylla hynrei ïa ka ri baroh kawei hadien ba ka khur takma rnong na rynsan ïakhun kaba la tip da ka ‘Asian Kickboxing Championship 2024’ kaba long ha Cambodia.
Kumban shu pynkynmaw, ka samla Daniella, ka thei ïalehkai kick boxing ba marwei na jylla (Meghalaya) ka la ïoh mihkhmat ïa ka ri India hapoh ka lama jong ka WAKO India Kickboxing Federation ban ïashimbynta ha katei ka Championship kaba la sdang naduh 6 tarik haduh 13 tarik mynta Risaw 2024. ïa kane ka lympung la pynlong da ka Asian Kickboxing Federation hapoh ka jingpeit jong ka WAKO International Italy ha Phnom Penh, Cambodia.
Kum ka kynhun, ka MSKA ba la lamkhmat da u Working President u Bah Lorenzo Pearson Warjri uba dei ruh u Executive Member jong ka WAKO India Kickboxing Federation ha ka 17 tarik u Risaw, 2024 ka la pynkup burom ïa ka samla Daniella ha ka jingïalang kaba kyrpang kaba la long ha Hotel Assembly, Shillong.
Lah ban kdew, naduh u bnai Nailar 2017 haduh u Risaw 2024, ki rang bad ki thei ïalehkai jong ka Meghalaya State Kickboxing Association ki la la lah ban khur 222 tylli ki takma ba kynthup ïa ki 83 tylli ki takma ksiar, 57 tylli ki takma rupa bad 82 tylli ki takma rnong bad kynthup ruh ïa ki 41 tylli ki takma na ka rynsan ïalehkai bar ri lane International kiba la long shabar jong ka ri India bad 9 tylli ki takma na ka bynta ka skulbah NEHU ha ka rynsan All India Inter University Games naduh u snem 2019.
Ka samla Daniella ka la wan kyrdan ba lai ban pynthikna ïa ka takma rnong ha ka thup ïakop jong ka K1 Rules Event na bynta ki kynthei kiba hapoh 56 Kg.
Ha kajuh ka por ka MSKA ka la ai khublei ruh ïa ka Sorkar Jylla Meghalaya, khamtam ïa u Myntri Rangbah – u Conrad K Sangma, u Myntri ka tnat Sports- Bah Shakliar Warjri, ki nongoynïaid jong ka tnat Sports ka Sorkar Jylla, lem bad kiwei naduh kiba haïing hasem jong ka samla Daniella bad ka kynhun Team Revolution hapoh ka jingïalam jong u Bah Sam Lyngdoh, na bynta ki jingkyrshan kaba la pynurlong bad pynpoi ïa ka sha kane ka kyrdan tad haduh ban khur takma na ka Asian Kickboxing Championship.
Khadduh ka MSKA ka la pynpaw ïa ka jingsngew nguh ïa u Santosh K Agrawal, u ba dei u President jong ka WAKO India na bynta ka jingkyrshan kaba u la ai ïa ka kynhun India ban don ha ka thup kyrdan ba 5 (Ranking No 5) ha ka Asian Kickboxing Championship 2024.
