Shillong, Naiwieng 02: Ka kynhun ïalehkai Table Tennis jong ka Meghalaya ka la ïoh ban khur katto katne ki takma ha ka 4th North East Masters Table Tennis Championship, ha Pasighat kaba la poi sha kaba kut ha ka sngi Thohdieng.
Ka Meghalaya ka la phah ïa ka kynhun kaba don 15 ngut ki nongïalehkai hapoh u nongpynïaid jong ka kynhun u Sudesh Pradhan kaba la ïoh ïa ka jingjop kaba khraw.
Ha ka kyrdan ïalehkai kiba la 60-snem tam ka kynhun jong ka Meghalaya ba kynthup ïa u Santanu Ghosh, Harendra Singha, Arup Nag bad Surjya Pyngrope ki la khur ïa ka takma rnong.
U Ghosh bad u Nag ki la jop takma rnong ha ka jingïalehkai kaba mar shijur ha ka kyrdan 60-snem shajrong.
U Bah Kynshanborlang Ranee, uba ïashim bynta ha ka sien ba nyngkong ha kane ka lympung, u la ïoh ban jop takma rupa ha ka jingïakhun ba mar shijur (double) jong kyrdan ïalehkai kiba la 50-snem tam ryngkat u paralok u Sarwan Gareri, bad u la jop takma rnong ha ka jingïakhun kaba para marwei ha kane kajuh ka kyrdan.
Kane ka lympung ïalehkai Tennis kaba lai sngi lynter la pynlong da ka Arunachal Pradesh Masters Table Tennis Association (APMTTA), hapoh ka jingpeit jong ka North East Masters Table Tennis Forum.
Kane ka lympung ka pynïasoh lang ïa palat 160 ngut ki nongïalehkai table tennis ba la rangbah bha bad kiba tbit bha na baroh 8 tylli ki jylla jong ka thaiñ shatei lammihngi.
