Shillong, Jylliew 30: Ka Lamerphylla Damesha Kharsati ka la wanrah nam ym tang ïa ka jylla hynrei ïa ka ri hi baroh kawei da kaba khur takma rnong ha ka ‘23rd Milo Open International Karate Tournament’ ha Kuala Lumpur, Malaysia.
Ka Lamerphylla D Kharsati kaba ïakhun ha ka kyrdan – 68 kgs Senior female jong ka kumite, ka la lah ban pynpaw pyrthei ïa ka sap ka phong bad ka jingthrang ban khur jingjop naduh ba sdang kane ka lympung ba la pynlong ha Titiwangsa Indoor Stadium naduh ka 26 tarik haduh 30 tarik Jylliew, 2024.
Ka jingtrei shitom kaba la shimpor da ki bnai ban pyntbit ïalade bad ka jing lenlade ban pynleit jingmut ha kane ka jingïalehkai ka la pynlong ïa ka Lamerphylla D Kharsati ban kynjoh sha kane ka thong.
Da kaba khur ïa ka takma ksiar, ka Lamerphylla D Kharsati ym tang ba ka la wanram burom ïa ka ri India hynrei ka la pynpaw shai ba ka don ka jingthrang ha ka ban bteng khur jingjop na bynta ka ri.
“Ban shimbynta ha ki rynsan ïakhun International bad ban ïoh khur takma ka dei ka jingjop kaba khraw ha ka jingim jong Nga. Nga sngewnguh na bynta kane ka lad ban mihkhmat ïa ka ri India bad Ngan ïai bteng ban nang pynjanai bad trei shitom ha ki lympung ki ban dang wan,” la ong ka Kharsati.
Ka jingjop jong ka Lamerphylla D Kharsati ka la plie shai kdar ïa ka jingmut jingpyrkhat ban kyntiew ïa ka sport bad ka jingdonkam ban kyrshan bad pynshlur ïa ki nongïalehkai (athlete) kiba angnud ban kiew shaphrang ha ki lympung ba ki shimbynta.
