Khur suk ka Shillong Lajong ïa ki lai point ha ka SPL, 10 ngut ïakhun ka Laitkor

Shillong, Nailur 02 : Ka lahduh jong ka lympung Shillong Premier League ha ka samoi ïalehkai kaba la dep, ka Shillong Lajong FC ka la ïoh ban pynliem noh da 2-0 kol ïa ka Laitkor SC, ha ka jingïakhun kaba long ha ka janmiet ha sngi Baar ha madan jong ka SSA Stadium, First Ground, Polo.
Ïa kine ki artylli ki kol la thep ïa ki da u Deibormame Tongper ha ka minit ba 27 jong ka jylla step katba u Emanbha Marbaniang u la ïoh ban thep ïa ka kol kaba ar ha ka minit kaba 79 jong ka kylla miet.
Na ka liang ka Laitkor SC ha kane ka janmiet ka la hap ban ïakhun sa tang 10 ngut ki rangïalehkai ha madan hadien ba ka la shah beh noh uwei na madan.
Ha kane ka janmiet jong kane ka jingïakhun u Deibormame u la ïoh ban ïalehkai nyngkong eh ha kane ka samoi kaba mynta bad ba u la ïoh ban thep ïa kane ka kol ha kaba u la ïoh ban khyrwit jam da ka khlieh ïa ka bol kaba la wan lyngba ka freekick.
Hadien kane, ka Laitkor ruh kam shim la randien, hynrei ka la pyrshang lem ban ïoh pynkhih lem ïa ka jar, ha kaba ka kabu ksiar kaba la wan lyngba u Freelyson Tariang, uba la ïoh haduh artylli ki kabu ksiar. Kawei ka wan hadien ba ka bol ba u la ïoh ba un tied da ka khlieh ka la kiew shalor ka dieng kol, kaba ar pat kadei kaba u la ïoh ban shut jam bha ïa ka bol kaba la lait hi phar sharud jong ka kol.
Haba bteng ïa ka kylla miet u Richarles Rani u la hap ban mih noh shabar ka madan ïakhun ha ka minit kaba 66 hadien ba u la ïoh ban pdiang beit beit da ka red card na u referee namar ka jingleh bakla ïa uwei na ki rangïalehkai ka Lajong.
Dei na kane ka daw kaba pynlong ïa ka kynhun ban hap ïakhun hi tang 10 ngut ha ki minit ba sah tad haduh ban da kut ka por ïalehkai.
Ka long pat kaba itynnad ban ïohi ïa ki rangïalehkai ka Laitkor kiba ïa khun tyngeh khlem shah jem bad ïoh ruh katto katne ki kabu ban pynsyier ïa ki rangapdien ka liang pyrshah.
Da kane ka jingjop, ka Lajong mynta ka la ïoh ba kan khur 7 point bad ban bat ïa ka kyrdan kaba ar kham hadien ka kynhun ïalehkai jong ka Nangkiew Irat kaba la ïoh khur 9 point. Katba ka Laitkor SC ka la ïoh ba kan khur shwa tang 3 point bad ban don ha ka kyrdan kaba 6 .
Ka jingïakhun ha kane ka sngi Balang kan dei artad ka jingïakhun ba khatduh ka kylla kaba lai (Rd-3) ha kaba ka jingïakhun kan long hapdeng ka Mylliem pyrshah ïa ka Malki kaban long ha ka por 4:30 baje nohphai sngi.