Khur namjop u Kisan Bareh & Ebiang Langstang, rem u Johny Nongrum

Shillong, Naitung 31: Arngut ki samla ïakhun MMA jong ka jylla na ka Team Revolution MMA, Shillong, ki la ïoh ban khur ïa ka namjop ha rynsan ïakhun jong ka Bidang Fighting Championship  Season 3 kaba la long ha Ulubari Guwahati, Nehru Stadium hynnin ka 30 tarik Sngi Saitjaiñ.
Kine ki arngut ki kynthup ïa u Kisan Bareh bad u Ebiang Langstang. Na ka liang jong u Kisan Bareh u la lah ban jop ha ka kyrdan ïakhun Bantamweight pyrshah ïa u Lima sunep na TCA, Nagaland lyngba ka submission  ha ka wat kaba lai.
U Ebiang Langstang u la khur ïa ka namjop ha ka wat kaba nyngkong jong ka jingïakhun pyrshah ïa u Aryan Trevidi na Gujarat  ha ka thup kyrdan ïakhun Flyweight, kaba la wan hadien ba u la ïoh ban ksih ryngdang lane kata ka Rear Naked Choke (RNC) kaba la pynlong ïa u Aryan ban rai rem.
Katba u Samla Johny Nongrum Sports Secretary jong ka North Khasi Hills District u ba ïakhun Co Main Event jong kane ka lympung ïakhun u la mad ïa ka namrem ha u Abhijeet Patkar na Maharastra ha thup kyrdan jong ka Light Heavy weight.
Watla kata ruh, na ka liang jong u Johny Nongrum u la ïakhun pyneh triang ban khur ïa ka namjop bad lah ban ïalam shaduh kaba kut, hynrei phewse u Abhijeet u la jop salit lyngba ka rai na ki nongbishar (unanimous decisions).
Ki la don ruh katto katne ngut ki nongjop kiba dei na ka Nongpoh  GnP MMA Gym. Bad kine ki kynthup ïa u Donbester Syiemlieh, u Carrey Nongrum., u Jonnibor Tron.