Khur namjop lai tylli ki kynhun, ïakhaid ha ar tylli ki jingïalehkai

Shillong, Nailur 22: Ki jingïakhun jong ka lympung SSA U-20 4th DIVISION Football League 2023 kaba la pynlong ha madan 3rd Ground MFA Turf Polo hynne ka Sngi Thohdieng.
Ha ka jinglehkai ba nyngkong ka Pynthorbah SC ka la rem da 0-3 kol ha ka Riatsamthiah SC. ïa ki lai kol na ka Riatsamthiah SC la thep da u Dingbarous Nongsiej (16 & 41 min) nangta na u Jerry Donboklang Kharkongor ha ka minit ba 45.
Haba phai sha ka jingïakhun kaba ar hapdeng ka Laitkroh SC pyrshah ïa ka Mawñianglah Youth SC ka la jam sha kaba kut da kaba ïakhaid naba ym shym la don ba lah ban pynkhihjar.
Haba phai sha ka jingïakhun kaba lai hapdeng ka Diengpasoh SC pyrshah ïa ka Risa Colony SC, ka Risa Colony SC ka la khur ïa ka namjop da 1-2 kol.
Ki ar kol na ka kynhun ba jop la thep da u Nonistar Swer (4 min) bad u Riklansing Warmalai (35 min). Katba na ka Diengpasoh la thep da u Apbhalang Marboh (24 min).
Haba phai sha ka jingïakhun kaba saw hapdeng ka Madan S&CC pyrshah ïa ka Umrynjah SC, ka jingïalehkai ka la jam sha kaba kut ha kaba ym shym la don ba pynkhihjar.
Haba phai pat sha ka jingïalehkai kaba khadduh, ka Mawkriah West SC ka la pynliem ïa ka Pommura SC da 2-1 kol ban khur ïa ka namjop.
ïa ki ar kol na bynta ka Mawkriah West SC la thep da u Leverence Jeremy Nongbri (26 min) bad u Waricky Shabong (37 min).
Katba ka shi kol na bynta ka Pommura SC- la thep da u Apporlang Mawthoh ha ka minit ba 60.