Khur namjop ka Mawkriah West SC bad ka Umrynjah SC
SSA U-20 4th DIVISION Football League 2023
![](https://mawphor.com/wp-content/uploads/2023/08/SSA-Logo.jpg)
Shillong, Nailar 23: Ki jingïakhun jong ka lympung U-20 4th DIVISION Football League 2023 ba la pynïaid da ka Shillong Sports Association (SSA) ba la long hynne ka Sngi Balang ha 3rd Ground MFA Turf, Polo ka la kut ha kaba ki ar kynhun ba khur namjop ki la jop salit da 1 kol.
Haba phai sha ka jingïalehkai kaba nyngkong kaba la sdang ha ka por 5:30 jan miet kaba dang sah hapdeng ka Laitkroh SC pyrshah ïa ka Mawkriah West SC ka la jam sha kaba kut ha kaba ka Mawkriah West SC ka la khur ïa ka namjop lyngba ka shi kol kaba la thep da u Damutskhem Nongbri- ha ka minit kaba 24.
Ha ka jingïakhun kaba ar kaba la sdang ha ka por 6:15 jan miet, ka Umrynjah SC ka la ïoh ban khur shalade ïa ka namjop da 1 – 0 kol pyrshah ïa ka Lumpyngngad SC, bad ïa kane ka shi kol na ka bynta ka Umrynjah SC la thep da u Keeperstar Lyngdoh ha ka minit kaba 35.
Mynta ka sngi kan don ar tylli ki jingïakhun ka ban sdang naduh ka por 5 baje jan miet, ha kaba ka Laitlulong SC kan aireng pyrshah ïa ka Madan S&CC.
Ka jingïakhun kaba ar kan long ha ka por 6:30 jan miet, hapdeng ka Iatyllilang SC ka ban ïakhun pyrshah ïa ka Mawlynrei SC, bad ka madan kan long ha 3rd Ground MFA Turf, Polo.