Nongstoiñ, Risaw 31 : Ka kynhun ïalehkai phutbol jong ka United SC Kolkata, ka la kheit ïa u soh jingjop jong ka, ha ka jinghiar madan ba nyngkong eh ha madan New Nongstoiñ na ka bynta ka lympung Invitation Knock Out Football 2022-23, ba la pynlong da ka New Nongstoiñ Sports Social and Cultural Club.
Ka nam jop sha ka United SC Kolkata, ka la jia long hadien ba ka la lah ban ïalehkai kham bha bun shah pyrshah ïa ka Khliehmawlieh YC, kaba dei ka kynhun ïalehkai na thaiñ Nongstoiñ, kat haduh ba ka la lah ban thep haduh lai kol la nod bad jam artad ïalade sha ka quarter final jong ka lympung.
Ki hajar ngut ki paidbah na kylleng ki jaka ka thaiñ Nongstoiñ, kiba la hiar ban sakhi ïa kane ka jingïalehkai sdang hynne ka sngi, ki la hun hi jrut ïa ka sur ïalehkai khamtam eh na ka United SC Kolkata, kaba la sei shisha ïa ka sur ïalehkai kaba itynnad naduh ba sdang haduh kaba kut.
Nangne shakhmat, kin sa nang ïohi shuh ïa kiwei pat ki kynhun kiba tbit bad bna nam napoh ka jylla lem bad jong kiwei de ki kynhun na shabar ka Jylla, ki ban sa hiar ïakhun ha mada New Nongstoiñ na ka bynta ka nam lahduh ha ryngkat ka song tyngka kaba long 7 lak tyngka. Ka NNSSCC ka la pynkhreh ruh ïa ka khusnam sha ka kynhun kaba wan ba ar kaba long 3 lak tyngka.
Hynne ka sngi plie, la donlang ruh da uwei na ki samla rangbah ka thaiñ Nongstoiñ u Bah Polestar Nongsiej kum u kongsan, ha kaba u la plie ïa kane ka lympung, ha ryngkat ki kyntien kitbok kit rwiang bad ai mynsiem shikatdei na ka bynta ka lympung bad sha baroh ki kynhun ba shimbynta. Na ka liang jong u, u la noh synñiang ruh sha ka NNSSCC ryngkat ka jingkitbok, ba kan nang lah ban pyntyllun bad ïai pynlong ïa kum kine ki lympung ban kyntiew ïa ka jingïalehkai phutbol ha ka thaiñ baroh kawei.
La pynphuh pynphieng bad pynshongshit da ki jingrwai ba sngew tynnad na ka kong Bateithymmai Nongrum lem bad ki jingshad na ki khun samla jong ka thaiñ. Ka jingïalehkai ka ban bud kaba dei ruh ka round of 16, kan long hapdeng ka MLP Football Team na nongbah Shillong ka ban ïakhun pyrshah ïa ka Golden Lion FC Rymbai. Kane ka jingïalehkai kan long ha ka 7 tarik mynta u bnai bad kan sdang beit thik ha ka por 1:30 noh phai sngi.
