Khur ka Phudmuri Presbyterian Mawlai ïa ka kyrdan balai ha ka NE Zone Science Drama

Shillong, Naiwieng 24 : Ka Phudmuri Presbyterian Higher Secondary School, Mawlai ka la wan ha ka kyrdan balai ha ka jingïakob jong ka North East Zone Science Drama Competition 2025, kaba long ha ka 21 tarik Naiwieng 2025, ha National Science Centre, Jawahar Nagar, Khanapara, Guwahati.
Ka Phudmuri Presbyterian Higher Secondary School kaba la mihkhmat ïa ka Jylla Meghalaya ka la wan balai napdeng ki 7 tylli ki skul na ka jylla jong ka Thain Shatei Lammihngi jong ka ri India kiba la ïa shim bynta ha kane ka jingïakob.
Haba wan ha kane ka kyrdan ka Phudmuri Presbyterian HSS ka la ïoh ïa ka khusnam kaba 4000 tyngka, katba u Mebadskhemlang Wahlang u ba la mihkhmat ïa kane ka School u la ïoh ïa ka nam kum u Best Actor, bad ka khusnam kaba long 1000 tyngka ryngkat ka certificate bad ka momento.
Kane ka long katkum ka kyrwoh ba la phah da i Principal jong ka skul, i Kong P Rynjah.