Khur ka North Liberty HSS haduh 17 tylli ki takma ksiar ha ka ‘Inter School Athletic Meet 2022’
Jowai, Jymmang 13: Ka North Liberty Higher Secondary School, Jowai kala wan ha ka kyrdan kaba nyngkong da kaba ïoh ban khur haduh 17 tylli ki takma ksiar ha ka ‘District Level Inter School Athletic Meet 2022′ ba la pynïaid da ka ophis u District Sports Officer ha ryngkat ka jingïatreilang bad ka West Jaiñtia District Sports Association, ha madan Kiang Nangbah Stadium Dongmihsngi, Jowai.
Ha kane ka ‘Inter School Athletic Meet’ la sdang ïa ka naduh ka 11 tarik u Jymmang bad pynkut mynta ka sngi 13 tarik u Jymmang 2022, ha kaba la wan ban ïashim bynta haduh 17 tylli ki skul na kylleng ka West Jaiñtia Hills District, ha ki lai kyrdan kata ka Under-14,16 bad 18 jong ki khynnah Shynrang bad kynthei.
La pynhap pyrda ïa kane ka ‘Inter School Athletic Meet’ wat hapdeng ka jingjur jong u slap haduh ka por nohphai sngi, haba phai sha ka nam ‘Best Team’ na ka liang ka North Liberty HSS ka la jop ha ka Under-14 jong ki khynnah shynrang/kynthei bad ka Under-16 ki kynthei, ka Govt. Boys HSS ka la jop haka Under-16 ki shynrang bad Under-18 ki synrang, katba ka Kiang Nangbah HSS kala jop ha ka Under-18 ki kynthei.
Ïa ka nam Best Athletic ha ka Under-14 boys la ïoh da u Adrick Da E mi tre Pathaw ka North Liberty HSS. Ha ka U-14 Girls la ïoh da ka Ham Mylliñ Phawa na ka Jowai Govt. U.P RMSA, Under-16 Boys la ïoh da u Iohi Ksan Lyngdoh na ka Govt. Boys HSS.
Ha ka Under 16 Girls la ïoh da ka Aroma Lyngdoh na ka JNV Mukhla. Katba ha ka Under-18 Boys la ïoh da u Sajemiki Shylla na ka North Liberty HSS, Ha ka U-18 Girls la ïoh da ka Rideimaia Pasi na ka JNV Mukhla kaba la jop ïa ka Short Put bad Discuss Throw (Ksiar). Ïa ka nam Best Discipline School la ïoh da ka St. Micheal & All Angel Secondary School.
Ha kane ka sngi pynhap pyrda la ïadonlang da u District Sports Officer ka WJHD ma K. Passah, Working President ka WJDSA ma EMH Passah, Vice President ma P. Lamare, Hony. General Secretary ma Lammat oo Laloo, u ma Dawanroi Pyrbot lem bad kiwei de.