Khur ka NEUFC ïa ka jingjop ba nyngkong ha Shillong, 4 kol pynliem ïa ka East Bengal

Shillong, Lber 08: Ka NorthEast United FC ka la lah ban khur ïa ka jingjop kaba 10 mynta ka samoi jong ka Indian Super League (ISL) 2024-25 hadien ba ka pynliem ïa ka East Bengal FC da 4-0 kol ha ka jingïalehkai ba khatduh ba la long ha Jawaharlal Nehru, Polo – Shillong, ha ka janmiet jong ka sngi Saitjaiñ.
Kiba la pynkhihjar ha kane ka jingïalehkai ki long u Nestor Albiach (59’minit), Alaaeddine Ajaraie (66’ 79’minit) bad u Mohammed Bemammer (86’minit).
Da kane ka namjop ka NorthEast United FC ka la pyndep ïa baroh 24 tylli ki jingïalehkai mynta ka samoi jong ka ha ka Indian Super League (ISL) 2024-25 da kaba kamai 38 point shuwa ban jam sha ka jingïakhun playoff. Kane ka dei ka sien kaba phra ba ka NorthEast United FC ka la pynkhihjar lai ne palat lai kol mynta ka samoi, bad kaba kongsan ka long ba ka la khur ïa ka jingjop kaba nyngkong ha ka jingïalehkai ISL ba la pynlong ha nongbah Shillong.
Ka East Bengal FC ka la ïoh khyndiat tylli ki kabu jong ka ha ka kylla step, hynrei ka jingpyrshang jong u Cleiton Silva ka la wanrah jingma shipor ïa ka NorthEast United FC lyngba ka free-kick ha ka 22 minit.
Ka NorthEast United FC ka la siew kylliang da kaba thaw ïa ki lad suki suki sha ka liang kadiang lyngba u Alaaeddine Ajaraie, uba la pashat ïa ka kol na ka bynta u Nestor Albiach ha ka minit kaba 32. U Nestor u la pyrshang ban thep ïa katei ka bol hynrei la pynsangeh noh ha u rangapkol jong ka East Bengal FC u Debjit Majumder.
Ka jingïatreilang hapdeng u Ajaraie, uba la pynphai biang ïa ka bol na ka bynta u Tondonba Singh sha ka liang kadiang, shuwa ba u Tondonba Singh un pashat ïa ka bol na bynta u Nestor uba don hapoh phyllaw kol. U Nestor u la shimti ïa ka bol shuwa ban thep jlang sha kol ban pynïakhlad ïa ka jingïakhaid ha ka minit ba 59 jong ka kylla miet.
Ka NEUFC ka la bteng da kane ka rukom ha kaba u Nestor u la long ka bynta ba kongsan ban pynwandur bad kham pynshongshit ïa ka jingïalehkai lyngba ka corner kick. U Guillermo Fernandez u la pashat ïa ka bol na bynta u Macarton Nickson uba la pyrshang mardor mar ïa wanpoi ka bol. U Debjit u la pynstet ban khanglad ïa ka jingpyrshang kaba nyngkong, shuwa ba u Ajaraie un shimti ïa ka bol bad pynrung jlang ïa ka sha kol ha ka 66 minit ban pynjlan ïa ka jinglamkhmat da 2 kol.
Hadien nangta, u Ajaraie u la shim ïa ka bynta kaba khraw da kaba thep ïa ka penalty ha ka minit kaba 79. Ka jingstet jong u Ajaraie ka la pynjynjar ïa ka rangapdien jong ka East Bengal, bad ha kaba khatduh u Tanmay Das (rangapdien ka East Bengal) u la hap ban pynkyllon ïa u ha madan kaba la pynïoh ïa ka penalty na bynta ka NEUFC.
U Tanmay Das ula shah beh noh hadien kawei pat ka foul ha ka minit kaba 84, kaba la ai jingmyntoi ïa ka North East United FC ha ka jingïakhun namar ka jingshah pynduna rangïalehkai na ka liang pyrshah.
Ka NorthEast United FC kam shym la sangeh bad ka la ïai bteng ban tur shakhmat; kaba la pynïoh biang ïa ka ban thep sa ïa kawei ka kol ha ka 86 minit lyngba u Mohammed Ali Bemammer.
Ha kane ka jingïalehkai ïa ka nam ‘Key Performer of the Match’ la khur da u Alaaeddine Ajaraie (NorthEast United FC) da kaba pyndep 17 tylli naki 21 tylli ki jingpyrshang pashat bol, bad pynkhihjar ar kol, bad thaw ruh saw tylli ki kabu ban thep, ryngkat bad saw tylli ki bol pashat kiba shyrkhei.
Hadien kane, mynta ka NorthEast United FC kan pynkhreh ïa ka jingïakhun playoffs, katba ka jingïaid lynti jong ka East Bengal FC ha ka ISL mynta ka samoi ka la poi sha kaba kut da kane ka jingïalehkai.