Shillong, Rymphang 05: Ka Meghalaya ka la ïoh biang ban khur sa ar tylli ki takma ha ki jingïalehkai kieng lieng (watersports) jong ka National Games kaba 38 ha Uttarakhand, ha kaba ka la khur ïa ka takma rupa ha ka canoe bad ka takma rnong ha ka rowing.
U Indra Sharma u la jop takma rupa ha ka canoe slalom C1 jong ki shynrang, katba ki shijur ba kynthup ïa ka Kiran Devi bad ka H Anandhi ki la wan ba lai ban khur takma rnong ha ka lightweight women’s double scull – ka jingïakop kieng lieng ba mar shijur.
Lah ban kdew ba kine ki takma ki bud hadien ka jingjop takma rnong jong u Pynshngain Kurbah ha ka jingïakop kieng lieng (canoe) hynnin ka sngi Hatmajai.
Halor kane, na ka liang jong u Secretary jong ka Meghalaya State olympic Association [MSOA] u la ai khublei ïa ki nongïalehkai bad ïa ki nongkitkam khamtam ïa u Vincent, Sheela bad ïa u Dr Ibo kiba la trei shitom khlem shongthait ban pynpoi ïa ka Jylla sha kane ka thong.
“Ka jingtrei shitom jong phi ka la buh shisha ïa ka Jylla ha ka National map. Phi la pynlong ïa ngi bad ïa ka jylla hi baroh kawei ban sngew sarong. Nga kwah ban ainguh ïa u Blei na bynta kane ka khubor ba bha kaba u la ai ha ka jylla jong ngi,” la ong u Bah Finely Pariat.
U la kitbok ruh ïa kiwei pat ki nongïalehkai ki ban dang ïakhun ha ki sngi ban wan ha ki jingïakop bapher bapher ba kin nang kiew shaphrang.
Da kaba khur kawei ka takma rupa bad ar tylli ki takma rnong ka Meghalaya mynta ka don ha ka kyrdan ba 29 napdeng ki 30 tylli ki kynhun kiba la ïoh ban khur takma haduh mynta ha kane ka National Games. Lah ban kdew ba ki dang don sa hynñiew tylli ki kynhun ki bym pat shym la jop takma.
