Khur ka Mawlai ïa ka jingjop kaba heh tam ha ka MSL, ïakhaid ka Rangdajied

Shillong, Risaw 28: Ki paid riew ieid phutbol ha Shillong ki la sakhi ïa ka jingjop kaba bun kol tam ha ka lympung Meghalaya State League ha kaba ka lahduh jong ka SPL 2023- ka Mawlai SC ka la pynkhihwin da kaba jop kput haduh 16 kol ïa ka Seng Samla Mawmluh, ha ka jingïalehkai na ka Group F ha Shillong.
U Khrawkupar Jana (18′, 26′, 28′, 63′) bad u Donlad Diengdoh (20′, 39′, 70′, 90′) ki la ïoh ban pynkhihjar mar saw kol, nangta u Fairming Suting (73′, 85′) u la thep ar kol, katba u Batskhemlang Mawlong (22′), u Robertson Khongriah (56′), u Overkindness L Mawnai (58′), u Banraplang Pyngrope (78′), u Romarius Laban (83′) bad u Brolington Warlarpih (86′) ki la ïoh pynkhihjar mar kawei.
Ha kawei pat ka jaka, ka lahduh ba ïada ïa ka burom – kata ka Rangdajied United FC ka la sah lyngngoh khlem da ïoh pynkhihjar ban ïakhaid bad ka Rymbai Skhenshynriah ha ka jingïalehkai na ka Group D jong ka Meghalaya State League 2024 kaba la long ha Khliehriat.
Haba phai pat sha ka jingïakhun ka Group B ha Mawkyrwat, ka kynhun ba wan ba ar ha u snem ba ladep – ka Khliehmawlieh Youth Club ka la shah pynliem noh ha ka Mawten SC da 2-1 kol.
Ha ka jingïalehkai, dei ka Khliehmawlieh kaba la lamkhmat nyngkong ha ka 52 minit lyngba ka kol u Livingstone Nongrang, hynrei tang hadien 2 minit (54’) ka Mawten ka la pynïakhaid lyngba u Oversharp Iawphniaw shuwa ban thep ïa ka kol pynjop ha ka 87 minit.
Ha kiwei pat ki jingïalehkai, ka Group A ha Tura hapdeng ka Chipakkore bad ka Atong Matgrik ki la poi sha ka jingïakhaid khlem da ïoh pynkhihjar (0-0). Katba ka Group E ha Wahiajer, ka Mawtari Myrdon ka la pynliem noh ïa ka Seinbhalang Shkentalang da 3-1 kol. U James Warlarpih (18′) bad u Baris Taro (39′, 67′) ki la pynkhihjar na bynta ka Mawtari Myrdon, katba u Tip Rasmut (45’+1) u la thep na bynta ka Shkentalang.
Ki jingïalehkai ka MSL 2024 kin wanphai pat lashai ka sngi Balang (30 tarik Risaw) ha baroh 6 tylli ki Group.