Shillong, Naiwieng 13: Ka Shillong Lajong ka la bteng ïa ka jingsynshar jong ka halor ka Rangdajied United da kaba jop ïa ka jingïakhun phainal jong ka lympung SSA Super Cup 2025 kaba nyngkong eh da 3-1 kol hynne ka janmiet jong ka sngi Palei, ha madan First Ground-SSA Stadium, Polo.
Ka la long ka jingïakhun kaba suk ha kaba ka kynhun kaba khlaiñbor jong ka thaiñ ki la pynshongshit ïa ki hajar ngut ki nongpeitkai kiba la tuid ha madan da ka jingïalehkai kaba itynnad bha. Hynrei ban jop ïa kane ka jingïakhun, ka SLFC ka la hap ba wanphai nadien namar dei ka Rangdajied kaba la pynkhihjar nyngkong lyngba u Denelson Pyngrope (25’) ban lamkhmat ïa ka phainal.
Ka penalty na u Iohborlang L Lyngkhoi (45’+2) ha ki minit pynjlan jong ka kylla step shuwa ban jam sha ka por shongthait lem bad ki ar kol ha ka kylla miet jong u Wilbert Marbaniang (55′, 72′), uba la khur syndon ïa ka nam Player of the Final ka la pynskhem ïa ka jingjop na ka bynta ka Lajong.
Ki riew pawkhmat kiba la wan sakhi ïa katei ka jingïakhun ki long u Myntri Rangbah ka jylla u Conrad K Sangma, u Myntri ka tnad ïalehkai u Bah Wailadmiki Shylla, u nongai buit jong u Myntri Rangbah ka jylla u Bah Paul Lyngdoh MLA bad u president ka SSA u Bah Banteidor Lyngdoh MLA.
Kum ka lahduh ka Lajong ka la ïoh khur ïa ka khusnam pisa kaba T.2 lak katba ka Rangdajied kaba wan ba-ar ka la ïoh ïa ka khusnam pisa kaba T.1 lak.
Ha kajuh ka por, ha ka jingïalang sam khusnam kaba la bud hadien ka phainal la pyndonkam ruh ban pynkup burom ïa ka Langsning kaba la rah ïa ka nam lahduh jong ka Shillong Premier League 2025 ha u bnai ba la dep. Ki la ïoh khur ïa ka song khusnam kaba T.6 lak kum ka lahduh, katba ka Lajong, kaba la wan kyrdan ba-ar (runners-up), ka la ïoh ïa ka song khusnam kaba T.3 lak. La sam ruh ïa ka khusnam shimet sha u Loving Suting jong ka Mawlai, kum u nongthep ba bun tam lane Top Scorer jong kane ka lympung. U Loving ula pyndep ïa ka samoi da kaba thep 7 kol ban khur ïa ka nam Top Scorer.
Ka SSA ka la sngewnguh ruh ban don ïa u Myntri Rangbah ka Jylla ban plie paidbah ïa ka trophy jong ka SSA Champions Cup ba thymmai, ka lympung ïalehkai league-cum-knockout ka ban kynthup ïa ki ar tylli ki kynhun ba hakhmat eh na kawei pa kawei na ki san tylli ki kyrdan (Division) jong ki lympung phutbol jong ka SSA. Kane ka lympung kan sdang ha ka taïew ba khatduh jong u Naiwieng ynda la pynkut ïa ka First Division.
Ka tnad ïalehkai jong ka Sorkar Jylla kaba la ju kyrshan ïa ka SSA ha ka liang ka jinglut jingsep ban pynïaid ïa ki lympung phutbol kiba bun jong ka bad hynne ka sngi na ka liang jong u Myntri ka tnad ïalehkai ula pynbna sa T.10 lak tyngka kum ka jingkyrshan ïa kane ka synjuk.
Haba wanphai biang sha ka jingïakhun, ka Rangdajied ka la ïoh katto katne tylli ki korner kick ha kaba sdang jong ka jingïakhun bad khatduh ka la lah ban pynurlong ïa ka kol na ka korner kaba saw lyngba u Denelson.
Hadien kata baroh arliang ki la ïoh katto katne ki kabu ki bym shym la sei soh bad ka Rangdajied ka la paw kumba kan pynkut ïa ka kylla step da kaba lamkhmat shi kol. Hynrei ka Lajong ka la kyntait da kaba pynïakhaid lyngba u Iohborlang tang shuwa ban kut ka kylla step.
Katei ka kol ka la nang pynskhem ïa ka rukom ïalehkai na ka bynta ka Lajong, ha kaba ka la ïoh ban tehlakam bun shah ïa ka bol ha ka kylla miet. Ki la ïoh ban lamkhmat kylla ïa ka jingïakhun hadien ka jingbakla jong u nongïalehkai ba shadien ka RUFC ka la ailad ïa u Wilbert ban khyrwit jlang ïa ka bol shapoh kol. Nangta u la lah ban pynjlan ar shah ïa ka kol lamkhmat da 3-1 ha ka minit kaba 72. Kane ka kol ka la buh ïa ka Rangdajied ha ka kutlad ban pyrshang wanphai.
