SHILLONG, Risaw 09: Ki khynnah ïalehkai (Athlete) kiba la mihkhmat ïa ka Meghalaya hapoh ka lama jong ka Meghalaya Athletics Association ki la lah ban wanrah nam ïa ka thaiñ da kaba khur 4 tylli ki takma na ka lympung ïalehkai “35th East Zone Junior Athletics Championship 2024” ba la long ha Bhubhaneshwar, Odisha kaba la sdang naduh 07 tarik haduh 09 tarik Risaw.
Kine ki saw tylli ki takma ki kynthup kawei ka takma ksiar, ar tylli rupa bad kawei ka rnong.
U Rikangku D Sangma u la ïoh ban khur ïa ka takma rupa ha ka jingïakop kawang sum (Javelin) jong ki khynnah shynrang ba hapoh 14 snem, bad kane ka la wan hadien ba u la lah ban pynsied haduh 52.35 metar.
Ka Anrisha Klein ka la khur takma rupa ha ka High Jump jong ki kynthei ba hapoh 20 snem (High Jump U20 Women). Ka la lah ban kynthih ha jingkynjang kaba 1.53 Metar. Katba ka paralok, ka Rinalis Ingti ka la jop takma rnong hadien ba lah kynthih 1.50 Metar ha kane kajuh ka thup ïakop.
Kaba seisoh tam ha ki jingïalehkai ïa ka jylla ka la wan ha ka ‘4 x 400M mixed relay U20 mixed’ ha kaba ki la khur ïa ka takma ksiar. Ka kynhun mareh shynrang bad kynthei ba kynthup ïa u Donbok shabong, u Renaldi Dhar, ka Bethylene G Makri bad ka Damika R Lyngdoh ki la ban pyndep ïa ka jingmareh da 3:48.45 minit.
Na ka liang jong u Bah Finely Pariat, General Secretary ka MAA, u pynpaw ïa ka jingsngewsarong na bynta ki khynnah lehkai. Watla ki la ïoh tang khyndiat por ban pynkhreh ïalade hynrei ki la lah pat ban wanrah takma ïa ka jylla bad bun na ki khynnah ki la lah ban leh kham bha shuh shuh ha kane ka jingïakop.
U la ai khublei ruh ïa ki coach, ba kynthup ïa ka Kong Daisy Marwein, Pleasantly Synnah, Amin Kharkongor bad Fedelia Sunn kiba la ïalam ïa ka kynhun sha kane ka Championship.
Ka synjuk ka ai khublei ruh ïa u Director ka tnat Sports jong ka Sorkar Jylla – u D Shira, ïa u Bah Paia B War Nongbri na bynta ka jingkyrshan ba ki la ai bad ruh ïa ka tnat Sports kaba pynurlong ïa kane ka jingleit ïashimbynta.
Haba phai dien, ka Meghalaya Athletics Association ha ryngkat ka jingïatreilang bad ka tnat Sports jong ka Sorkar jylla ka la ïashimbynta ha kane ka ‘35th East Zone Junior Athletics Championship’ ha ki kyrdan bapher bapher (Under -14, 16, 18 & 20). Ka MAA ka la sei ïa 15 ngut ki khynnah shynrang bad 16 kynthei kiba la jied hadien ba ki la seisoh bha ha ka State Level Inter District ba la pynlong mynta u snem ban mihkhmat ïa ka jylla sha kane ka jingïakop.
