Khur ka ïasnohktilang bad ka Umpling SC ïa ka namjop ba nyngkong

Shillong, Naitung 05: Ki thei kynjat bol jong ka ïasnohktilang Madanrting FC bad ka Umpling SC hynnin ka Sngi Balang ki la ïoh ban khur ïa ka namjop kaba nyngkong ha rynsan ïalehkai jong ka lympung Shillong Sports Association’s Women’s League kaba la long ha madan Third Ground, Polo.
Ka jingïalehkai jong kine ki saw kynhun ka la long shisha kaba ïakhaid hynrei ki ar kynhun ki bym pat shym la jop shisien ha kane ka lympung ki la ïoh ban khylliap ïa ka jingïalehkai da kaba khur shalade ïa ki lai point.
Haba phai sha ka jingïalehkai kaba nyngkong, ki thei kynjatbol jong ka ïasnohktilang ki la long ki nongjop hadien ba ki la lah ban pynliem da 2-0 kol ïa ka Kharang SC na ka thup jong ka Group B, katba ka Umpling kaba ïakhun hadien ha ka por 4 baje ka la jop salit ïa ka Mawkriah West SC da 1-0 kol na ka thup kynhun jong ka Group A.
Na ka bynta ka ïasnohktilang kine ki ar kol la ïoh ban thep ha ka kylla kaba ar. Ka Jerina M Mawlong ka la ïoh ban pynkhih ïa ka jar kaba nyngkong ha ka minit kaba 51′ bud sa ka kol na ka Aitibha Thabah ha ka 56′ minit.
Haba phai sha ka jingïalehkai kaba hadien, ka kynhun lehkai jong ka Mawkriah West ka la dei ban sngew sarong hadien ba ka la lah ban ïalehkai bha ban kyrshan skhem shadien khlem da ailad ïa ki player ka Umpling ban pynkhihjar tad haduh ka 54 minit shuwa ban shah thep lyngba ka penalty kaba la shut da ka Streamlet Taro (54′).
Haduh mynta, ka Mawkriah ki la shah thep haduh 32 kol ha ki ar tylli ki jingïalehkai ba ladep jong ka hynrei ha kane ka jingïakhun ki la lah ban ïada na kane pyrshah ïa ka Umpling wat hadien ba ki la hap ban kyrshan skhem shadien naduh kaba sdang jong ka jingïalehkai.
Ka jingïakhun lashai ka sngi kan dei na ka thup kynhun ka Group A, ha kaba ka PFR Football Academy kan aireng ïa ka Kick Start Football Coaching Centre ha ka por 2:30 baje jan miet bud sa ka jingïalehkai hapdeng ka Laitkor SC pyrshah ïa ka Lawei Smit SC ha ka por 4:15 janmiet.