Shillong, Nailar 24: Ka BSF Senior Secondary School sa shisien pat ka la paw biang ha ki kam ba janai, ka la mih kum kata ka ïing jong kiba don sap ba shisha, ki kam jingshna lyngba ki buit bad ki sap bad ïa kane ki la pyni ha ka Edmundian Fest. Da ka jinglah ban pyni bad ki jinglah ban jop ha kiba bun ki kyndan, ki khynnah skul jong ka, ki la wanrah ka jingsarong bad ka burom ïa kane ka skul.
Ka khynnah pule kaba la ïoh ka jingjop kaba hakhmat eh ka dei ka Nazia Pearl Sooting, lyngba ki jinglah jong ka ban ai ka jingkren kaba janai ka la ïoh ïa ka khusnam Best Speaker Award ha ka jingïakob tyrko (Debate Competition). Kane ka jingïoh ïa ka khusnam ka la sakhi ka jingshemphang jong ka, bad ka Nazia ka la ïaibteng ban jop ha ka First Prize ha ka Brain Whiz Competition, ha kaba kane ka la wanrah ka burom ïa ka skul ki shipai BSF baroh kawei.
Katba ka Indian Dance troupe ka la pynshong shit ïa ki nongpeit bad ki nongsngap lyngba ka jinglah jong ki ban lehbha ha kaba kane ka la wanrah sha la ïing ïa ka First Prize. Haba ïadei bad ka thoh ka tar u Shenaz Khan u la poi sha ka kyrdan Third Prize ha ka Acrostic Writing, bad kiwei pat ki khynnah pule kiba nang ha ka shet ka tiew ki la poi ha ka kyrdan Second Prize ha ka kyrdan ki trai ri trai muluk bad ha ka Third Prize ha ka International Category kaba ïadei bad ka Cookery Competition.
Haba ïadei bad ka jingdon ka sap ba kyrpang, u Josiah, u la jop ha ka Third Prize ha ka jingnang ban shna ki phlim Cartoon.
“Kine ki jingjop ki la ïeng kum ka sakhi halor ka jinglah ban aiti jong ka BSF Senior Secondary School ban kyntiew ïa ka pule puthi, ban ohshrong ïa ki samla pule kiba janai ha ki kam pule, nangta ha ka kam arts, kam nongïalam bad kiwei kiwei,” ong ka kyrwoh na ki shipai BSF.
“Ngi pynpaw ka jingai khublei kaba kyrpang ïa ki khynnah skul bad kumjuh ruh ïa ka jingaiti met bad mynsiem jong ki nonghikai bad ki nongtrei kiba la ïalam lynti ïa ki. Kine ki jingjop jong ki, ki pynphalang ïa ki kam jong ka skul kaba ju ai mynsiem, kaba pynkupbor bad kumjuh ruh ka jingpynwandur ïa ki khynnah skul ban long ki nongïalam jong ka lawei ha manla ki rynsan,” bynrap ka kyrwoh.
