SHILLONG, Jylliew 11: Ka kynhun ïalehkai Karate jong ka Jylla Meghalaya hapoh ka lama jong ka All Meghalaya Karate – Do Association [AMKA] ka la ïoh ban khur 3 tylli ki takma na ka rynsan ïakop kaba la tip da ka ‘4th KIO National Cadet – Junior & Sub Junior Karate Championship 2025’ ha Dehradun. Kine ki takma ki long kawei ka rupa bad ar tylli ki rnong.
ïa kane ka lympung kaba saw sngi lynter la pynïaid da ka Karate India Organization bad la pdiang ban pynlong ïa ka da ka Uttarakhand Karate Association ha Dehradun, bad ka la sdang naduh ka 12 haduh 15 tarik Jylliew, 2025.
Kumban shu pynkynmaw, ka AMKA ka la sei ïa ka kynhun kaba don 28 ngut ki nongïalehkai, ba kynthup ïa 11 ngut ki khynnah kynthei bad 17 ngut ki shynrang, ban ïashim bynta ha katei ka Championship ha Dehradun. Bad la ïalam ïa ka kynhun da u Bah Donboklang Lyngdoh, Bah Edwillbert K Nongkynrih bad ka Kong Ester Mary Lyngdoh.
Napdeng kine, lai ngut ki la lah ban poi sha ka thong, ha kaba ka Esaranaki Kharjana ka la jop takma rupa ha ka kyrdan Sub Junior Girls 13 Years – 50 Kgs Ind. Kumite, nangta ka Daphishisha Shadap kaba khur takma rnong ha ka kyrdan Junior Girls – 48 Kgs Ind. Kumite, bad u Royal Jayden Laloo uba la jop takma rnong ha ka Sub Junior Boys 11 Years -40 Kgs Ind. Kumite.
Ha ka kyrwoh ba la pyllait na ka liang ka Association ka ai khublei kyrpang ïa ki nongïalehkai kiba la ïoh khur takma na ka bynta ka jinglah ban leh bha bad bad ai khublei ruh ïa baroh ki nongïashim bynta ïa ka jingtrei shitom bad ka jingaiti lut jong ki ha baroh kawei ka jingïakop.
