Jowai, Nohprah 12: Ka lympung ïalehkai phutbol jong ka Thadlaskieñ Sport Association Football League 2024 kaba la long ha ka 12 tarik u Nohprah, 2024 (sngi Palei), la sakhi ïa ka Young Star Namdong kaba la jop da 1-0 kol ïaka United Phyllongingkhaw.
Ka shikol na u Honesty Sumer ha ka minit ba 39 ka la pynthikna ïa ka Young Star Namdong ban khur ïa ka jingjop ha kane ka jingïakhun.
Ha kawei pat ka jingïakhun ba ar hapdeng ka Lumsyrtoh bad ka Nongkhroh Rim, baroh ar kynhun ki la ïakhaid da mar 1-1 kol.
Related Posts
Dei ka Nongkhroh Rim kaba la ïoh lamkhmat nyngkong lyngba ka kol na u Haman Myrboh haka minit ba 57 hynrei ka Lumsyrtoh ka la lah ban pynïakhaid noh lyngba u Mark Andrew Thubru haka minit ba 65.
Katba ha ka jingïakhun kaba lai la sakhi ïa ka Maia Club bad ka Madur SC kiba la ïakhaid khlem don ba lah thep kol (0-0).
Ka jingïakhun ha kane ka sngi – por 10 baje mynstep hapdeng ka Mukhla Veteran pyrshah ïa ka Grounded FC. Ha ka por 12 mynsngi ka Nartiang SC pyrshah ïa ka Onfroy Unite FC, katba ha ka por 2 baje nohphai sngi ka Tyrshang pyrshah ïa ka Nongkhroh Sohbar.