SHILLONG, Kyllalyngkot 02: Turshaprang CC bad ka Shibakha CC ki la jop ïa la ki jong ki jingïalehkai ha ka lympung Cricket League 3rd Division 2025 ba la pynïaid da ka Shillong Cricket Association kiba la long hynne ka sngi Thohdieng.
Na ka liang jong ka Turshaprang ka la pynliem noh da 6 wiket ïa ka Shillong Press, katba ka Shibakha ka la jop da 71 ron ïa ka Dynamite CC.
Ha ka jingïalehkai ba nyngkong, ka Turshaprang ka la jop ïa ka jingkynting pisa (toss) bad ka la aiti sha ka Shillong Press ba kan tied nyngkong, hynrei ka la lah ban kamai tang 88 ron bad hap 7 wiket haki 16 ober. Dei tang u Arham uba la kham pawkhmat ha ka tied da kaba kamai 28 ron naki 16 bol.
U Ruddystar jong ka Turshaprang u la khur 3 wiket bad ailad tang 12 ron naki 4 ober shuwa ba ka kynhun kan pyndep ïa ka kamram ban kamai 91 ron haki 9.2 ober ha ka jingduh noh tang 4 wiket ban jop ïa ka jingïakhun.
U Rudolf u la ïaineh haduh kaba kut, bad noh synñiang 41 ron naki 20 bol ha kaba ka Turshaprang ka la jop ïa ka jingïakhun da 6 wiket, hynrei ïa ka nam Player of the Match la khur da u Ruddystar uba la pynhap 3 wiket ha ka boling.
Ha ka jingïalehkai kaba ar ka Shibakha ka la kam trai ban tied nyngkong bad buh ïa ka thong kaba 199 ron ha ka jingduh noh 6 wiket haki 20 ober. U Jied Marbaniang u la lamkhmat ha ka tied da kaba kamai 79 ron naki 36 bol.
Haba pyrshang beh ka Dynamite ka la lah ban jubab tang 128 ron naba khyllem lut baroh 10 wiket haki 19.1 ober, ha kaba ka 52 ron (36 bol) jong u Vickey sharma ka la long leh nohei namar ka kynhun kam shym la lah ban poi sha ka thong.
U Prolin Phanjom u la kawang 4 ober bad khur 3 wiket ban ïaraop ïa ka Shibakha sha ka jingjop da 71 ron hynrei ïa ka khusnam Player of the Match la khur da u Jied Marbaniang.
