SHILLONG, Nohprah 17: Ka Rising CC bad ka Super Challanger ki la jop ïa la ki jong ki jingïalehkai ha ka lympung ‘Shillong Cricket League 3rd Division 2025’ ba la pynlong da ka Shillong Cricket Association, hynne ka sngi Palei.
Baroh ar tylli ki kynhun ki la pynliem ïa ki kynhun liang pyrshah da 4 wiket, ha kaba ka Rising CC ka la jop pyrshah ïa ka SMCA ha ka jingïalehkai ba nyngkong, katba ka Super Challanger ïa ka Sporting United.
Ha ka jingïalehkai ba nyngkong ïa ka jingkynting pisa (toss) la jop da ka Rising CC kaba la aiti ïa ka SMCA ba kan tied nyngkong. Ka SMCA ka la lah ban tied pyndep ïa ka 20 ober ba la mang ban kynjoh 185 ron bad khyllem 6 wiket.
U Tomu u la long uba kongsan tam na ka bynta ka SMCA, da kaba kamai 65 ron naki 45 bol. Katba u Altaf jong ka Rising CC u la khur 1/43 naki 4 ober.
Ka Rising ka lah ban jubab ïa katei ka thong, da kaba kamai 186 ron bad khyllem 6 wiket haki 20 ober, ha kaba u Bikash Lama u la long u namtam ha ka tied lyngba ki 56 ron ba u la kamai naki 34 bol, bad ban khur syndon ïa ka khusnam Player of the Match.
Ha ka jingïalehkai kaba bud ka Sporting United ka la shimti hi ban tied hadien ba jop ïa ka jingkynting pisa (toss) bad ka la buh ïa ka thong kaba shongkun, kata 223 ron haki 20 ober bad khyllem 5 wiket.
U Karan Chettri u la long uba kongsan tam napdeng ki nongtied ka Sporting United hadien ba u la kamai 87 ron naki 55 bol. Napdeng ki nongkawang bol ka liang pyrshah, u Bikram Pradhan u la khur 2/31 naki 4 ober.
Ka la donkam tang 19.3 ober ïa ka Super Challanger ban pyndep ïa ka kamram, ha ka jingïalam jong u Dilwar Kurbah (89 ron naki 33 bol), uba la khur ruh ïa ka khusnam Player of the Match, ka kynhun ka la lah ban kynjoh 224 ron na ka bynta 6 wiket.
