Shillong, Kyllalyngkot 10: Ka lympung ïalehkai kriket kaba la tip da ka Shillong Cricket League ha ka kyrdan Second Division ba la long hynne ka Sngi Thohdieng ha madan Urkaliar. ïa kane ka lympung la pynïaid da ka Shillong Cricket Association [SCA] ha ryngkat ka jingïatreilang bad ka Samkhamti.
Ha ki ar tylli ki jingïalehkai hynne ka sngi la sakhi ïa ka NWCC bad ka Sportive Junior kiba la khur ïa ka jingjop. Ka NWCC ka la lah ban pynliem da 4 wiket ïa ka Nongpdeng CC katba ka Sportive ka la jop da 99 ron ïa ka Acadimia Langsning.
Haba phai sha ka jingïalehkai kaba nyngkong, ka Nongpdeng ka la jop ïa ka toss bad jied ban tied nyngkong ha kaba ka la lah ba kan kamai 165 ron bad hap 6 wiket naki 20 over ba la mang.
U Maitshaphrang Khongjee u la long u ba seisoh tam ha ka tied da kaba kamai 88 ron naki 51 tylli ki bol, bud sa u Wanbor Lamare u ba la kamai 19 ron naki 13 bol. Na ka liang ki rangkawangbol jong ka NWCC u Lakhan Lal Das u la khur 2 wiket naki 4 over bad shah tied 38 ron.
Haba jubab ïa katei ka thong ba la buh ka NWCC ka la lah ban pyndep thik hapoh ka 20 over ba la mang, da kaba kynjoh 167 ron bad hap 6 wiket. U Pynkhrawbok Thaba (4 over: 14 ron: 2 wiket) bad u Wanbor Lamare (4 over: 39 ron: 2 wiket) jong ka Nongpdeng ki la khur mar 2 wiket ha ka bol.
U Lakhan Lal Das u la lah ban kamai 27 ron naki 18 bol na bynta ka NWCC, hynrei ka namtam ka long sha u Sanjiv Ghosh u ba la kamai 59 ron naki 45 bol ban khur syndon ïa ka nam ‘Player of the match’.
Ka jingïalehkai kaba ar hapdeng ka Acadimia Langsning bad ka Sportive Junior, ka Sportive ka la jied ban tied nyngkong hadien ba jop ïa ka toss. Ka la lah ban ïa ka thong haduh 259 ron bad tang 2 wiket kiba la hap naki 20 over ba la mang.
Ki la don ar ngut ki nongtied kiba la kynjoh tam ïa ka half centuri, ha kaba u Digbijoy Roy u la tied 88 ron naki 33 bol katba u Abhijeet Chanda u la kamai 70 ron naki 45 bol.
Ki ar wiket kiba la shah pynhap ki dei ba la khur marwei da u Mackie Blah (4 over: shah tied 42 ron: khur 2 wiket).
Haba pyrshang beh ïa katei ka thong ki nongtied jong ka Acadimia Langsning ki la lah ban kynjoh tang 160/4 naki 20 over. Watla u Shan Nongrum (52 ron naki 35 bol) bad u Samelawan s Nongkseh (47 ron naki 35 bol) ki la lehbha ha ka tied hynrei kam shym la biang ïa ka kynhun ban lait na ka namrem.
Ka Sportive ka la jop ïa ka jingïalehkai da 99 ron bad ïa ka nam Player of the match la khur da u Digbijiy Roy u ba la kamai 88 ron.
Ki kynhun ba ïashimbynta ki don haduh 10 tylli ba la phiah ha ki ar tylli ki Group, ka A bad B. Ki kynhun ha ka Group-A ki long: Nongpdeng CC, NWCC, Occult, Jersey King bad ka Masonic, nangta ha ka Group-B ki long: Metallica Rising, Akadimia Langsning, Sportive Junior, Cluster CC bad ka Lawsohtun.
Katkum ka prokram ba la pynbeit, ka wat ïakhun League stage naki Group kan kut haduh 07 tarik Rymphang, katba ka semi final ha ka 10 tarik.
