Shillong, Nailur 05 : Ka lympung ïalehkai football ba heduh ka thaiñ Mawkynrew ka Mawkynrew Cup mynta u snem 2022 ka la ïaid shaphrang, ha kaba ha ka sngi Saitjaiñ la ïoh ban pynïalehkai ïa ki saw tylli ki team jong ka Zone III ha madan ïalehkai football jong ka shnong Mawleiñ.
Ha ka jingïalehkai kaba nyngkong ki ar tylli ki team kiba la aireng ki long hapdeng ka Nongpyrdi SC pyrshah ïa ka Mawkynrew FC, ha kaba ka Mawkynrew FC ka la jop da kaba pynliem da 5-0 kol. Ïa kitei ki san kol la thep da u Skhemborlang Shylla (15min), u Pynshai Surong (21min), u Ïaineh Nongpluh (22 bad 33min) bad u Dwfender Mukhim (58min).
Ha ka jingïalehkai kaba ar ka la long hapdeng ka Umtong FC pyrshah ïa ka Umsham SC ha kaba ka Umtong FC ka la jop da 2-0 kol bad ïa kitei ki ar kol la thep da u Pynbiang Nongrum (20min) bad u Chesterfield Suting (23min).
Ha katei ka sngi la sakhi lang da ki nongkitkam jong ka Mawkynrew Cup Committee (MCC) ba kynthup u Bah T. Pohshna uba dei u Co-ordinator, Bah H. Kharbyngar, Bah S. Khriam, Bah A. Pyngrope, Bah I. Wankhar uba dei u Secretary ka MCC, ki riew rangbah, ki longkmie, ki samla haduh ki hep kiba rit.
