Shillong, Rymphang 01: Ka Lawsohtun bad ka Masonic ki la ïoh ban khur ïa ka jingjop ha ki ar tylli ki jingïalehkai ka lympung Shillong Cricket League Second Division 2024/25 ba la pynïaid da ka Shillong Cricket Association, ba la long ha ka sngi Saitjaiñ.
Ha ka jingïalehkai kaba nyngkong ka Lawsohtun CC ka la jop kput haduh 138 ron ïa ka Sportive Junior CC. La sdang ban tied nyngkong da ka Lawsohtun hadien ba jop ïa ka toss ha kaba ka la lah ban kamai 190 ron bad hap tang 2 wiket haduh kaba kut jong ka 20 over.
U Kynsai Lyngdoh u la kyrshan borbah da kaba kamai 70 ron naki 43 tylli ki bol, katba u Greatestfull Lyngkhoi u la kamai 52 ron naki 47 bol. Dei tang u Rohit d Sangma (4 over: shah tied 24 ron: khur 1 wiket) napdeng ki rangkawang bol ka liang pyrshah kiba kham seisoh.
Haba pyrshang beh ïa ka thong ka Sportive Junior ka la shah khanglad noh tang ha ka 11.4 over naba khyllem lut baroh 10 wiket bad kynjoh tang 52ron, dei tang u Digbijoy Roy uba la lah ban lehbha da kaba kamai 14 ron naki 19 bol.
Haba phai sha ki rangkawan bol jong ka Lawsohtun, u Andrew b Thabah u la ïoh ban khur 4 wiket naki 2.4 over bad ailad 16 ron naki bol jong u, katba u Hilarious Thabah u la khur 3 wiket naki 3 over bad ailad tang 9 ron.
Ha kaba kut ka Lawsohton ka la tam kput ban jop haduh 138 ron bad ïa ka nam Player of the match la khur da u Andrew b Thabah uba la khur haduh 4 wiket.
Ha ka jingïakhun kaba ar, ka Masonic ka la pynliem da 8 wiket ïa ka Jersey King. La sdang ban tied nyngkong da ka Jersey Kings hadien ba jop ïa ka toss, ha kaba ka la lah ban kynjoh 106 ron haduh kaba kut jong ka 20 over ba la mang bad hap 9 wiket.
U Vivek Sunar u la tied 24 ron naki 17 bol. Na ka liang ki rangkawang bol ka liang pyrshah, u Niraj Rana u la khur 2 wiket naki 4 over bad ailad tang 18 ron, katba u Bhuwan Thapa u la khur 1 wiket naki 4 over bad ailad tang 18 ron.
Haba beh ïa ka thong ka Masonic ka la lah ban kynjoh pura ïa ka 112 ron ba ka donkam da kaba hap tang 2 wiket naki 10.4over. U Bharat Rana u la kamai 32 ron naki 17 tylli ki bol, hynrei ka namtam lane Player of the match ka long sha u Niraj Rana, nalor ba u la khur 2 wiket ha ka bol u la lah ruh ban kamai 45 ron naki 23 bol kaba la kyrshan ïa ka kynhun ban jop da 8 wiket.
