Khur jingjop ka Jersey King bad ka Cluster CC ha ka lympung SCA Cricket League 2nd Division 2026
SHILLONG, Kyllalyngkot 14: Ka Jersey King bad ka Cluster CC ki la jop ïa la ki jong ki jingïalehkai ha ka lympung Shillong Cricket League 2nd Division 2026 jong ka Shillong Cricket Association kiba la long hynne ka sngi Balang.
Na ka liang jong ka Jersey King ka la lah ban jop da 32 ron pyrshah ïa ka Golf link XI Star, nangta ka Cluster CC ka la pynliem noh da 6 wiket ïa ka Nongpdeng CC.
Hadien ba jop ïa ka jingkynting pisa (toss) ka Jersey King ka la shimti hi ïa ka pali tied bad buh ïa ka thong kaba 163 ron haduh kaba kut jong ki 20 ober ba la mang bad hap 5 wiket. Ki nongtied kiba kongsan ki long u Raj Biswas (kamai 65 ron naki 45 bol) bad u Sunil Gurung (kamai 44 ron naki 33 bol).
Ha ka jingpyrshang jong ka Golf link XI Star ban beh ïa ka thong, ka kynhun ka la shah pynkhyllem noh baroh 10 ngut ki nongtied tang na ka bynta 132 ron haki 17.2 ober, bad dei tang u Mk Gosh (32 ron naki 47 bol) bad u Md.Feroz (24 ron naki 9 bol) kiba la noh synñiang kham bun ron hynrei ka jingtrei shitom jong ki kam shym la biang ïa ka kynhun ban kynjoh ïa ka thong.
Ka jingïaroh na ka bynta kane ka jingjop kaba 32 ron jong ka Jersey King ka leit sha ar ngut ki nongkawang bol, u Rajat Rizal (khur 4/28 naki 4 ober) bad khamtam eh u Avinash kr. Rai uba la khur 4 wiket bad ailad tang 19 ron na ki 3.2 ober, kaba la pynlong ruh ïa u ban khur ïa ka khusnam Player of the Match.
Ha ka jingïalehkai kaba bud, ka Nongpdeng CC ka la kam trai ban tied nyngkong hynrei ka jingtbit ki nongkawang bol jong ka Cluster CC ka la pynlong ïa ka Nongpdeng ba kan babe ïa kane ka rai, namar baroh 10 ngut ki la khyllem noh tang na ka bynta 68 ron haki 16.3 ober.
U Gyandeep Kachari u la ïoh ban weng 3 wiket haki 4 ober, katba u Azad Quereshi u la pynhap 2 wiket haki 2 ober. Hadien kane, ka kynhun ki nongtied jong ka Cluster CC ki la pyndep ban kamai 69 ron ha ki 8.3 ober, da kaba khyllem noh tang 4 wiket.
Ha kaba kut, u Basant Cheerti, uba la kamai 37 ron naki 10 bol na ka bynta ka Cluster CC , u la ïoh ban khur ïa ka khusnam Player of the Match.