Shillong, Jylliew 30 : Khyndiat sngi hadien ba ka Google ka la pdiang ïa ka Ktien Khasi ban don lang ha ka thup jong kiwei ki jait Ktien ban pynkylla sha ka ktien English bad kiwei kiwei lyngba ka Google Translate, na ka liang u Myntri Rangbah ka Jylla, Conrad K Sangma u la pynpaw ka jingsngewnguh ïa ka Google lyngba ka rynsan social media.
Ha ka kyrwoh, u Myntri Rangbah u la ong, “Khublei shibun Google na bynta ka jingithuh ïa ka Ktien Khasi ha ka thup ki jait Ktien. Kane ym tang ba kan pynkup bor ïa ki nongshong shnong hynrei kan ïarap ruh ïa kiwei kiba kwah ban nang ïa ka ktien jong ki nong Meghalaya.”
U Myntri Rangbah ha kajuh ka por u la ong, “Ngi kyntu ruh ïa ki ba kin kynthup lang ïa kiwei pat ki jait Ktien na kane ka thaiñ kum ka ktien Garo.”
Dang shen ka Google ka la pynbna ba la pynrung kumba 110 tylil ki jait Ktien ha ka Google Translate lyngba ka AI pyndonkam ïa ka (AI) kaba kynthup ïa ka ktien Khasi, Cantonese bad katto katne ki ktien na ka ri Africa.
Kitei ki ktien kiba thymmai kiba la pynrung kin mihkhmat na ka bynta palat 614 million ngut ki nongkren, kane kan plie lad ïa ka jingpynkylla ktien ïa kumba 8% jong ki paidbah kiba don ha kane ka pyrthei, ïa kane la pynpaw da ki nongmihkhmat jong ka Google company.
“Ki don ki ktien kiba ki nongkren ki long palat ïa ka 100 million, katba kiwei pat ki ktien kidei ki jong ki Jaidbynriew rit paid bad ki don ruh ki ktien kiba ki nongkren ki duna bha hynrei kadei pat ka jingpyrshang ban pynkhie im biang ïa ki”.
Ka jingpynrung ïa ka ktien Khasi ha ka Google Translate, kan ïarap shibun na ka bynta ki paidbah ka ri bad kumjuh ïa ki nongjngohkai kiba na kylleng ki ri kiba wankai sha ka jylla Meghalaya, kaban ïarap ïa ki ban ïakren bad ki trai shnong ha ka ktien Khasi. Watla ha ka jylla kiba bun ki nongshong shnong ki kren ïa ka phareng wat lada kam long kaba beit pura bha, da ka jingpyndonkam ïa ka Google Translate kan ïarap shibun ban kyntiew ïa ka ïoh ka kot lyngba ka kam jngohkai.
Katkum ka Britannica Company kaba la ïaid bha ha ka jingthoh ha ka Encyclopaedia ha ka ktien phareng, kila don kumba 900,000 kiba kren ïa ka Khasi bad kiwei pat ki ktien kiba kynthup ïa ka Amwi (War), Synteng (Pnar) bad Lyngngam.
Lah ban ong ruh, ba ka la don ka jingdawa ba dei ban pynrung noh ïa ka ktien Khasi ha ka Khyrnit kaba Phra jong ka riti synshar ka ri bad kane ka jingdawa ka dang sahteng bad ka sorkar pdeng ba kan ai ïa ka jingmynjur.
