Shillong, Rymphang 23 :Ha ka sien kaba nyngkong eh, u President jong ka Meghalaya Cricket Association (MCA), James P.K. Sangma u la pynlong ïa ka jingkynduh lang bad ki nongïalehkai na kylleng hapoh ka lama jong ka MCA ba kynthup naduh ki nongïalehkai shynrang bad kynthei (Senior), nangta kiba hapoh 23 snem bad kumjuh ha ka thup kiba 19 snem ka rta.
Kane ka sienjam ka long ban plie lad ïa ki ban ïoh ban syllok lang ha ryngkat ka jingdon lang ki nongïalam jong ka Synjuk.
Watla na ka liang u President u la ju leit ban kynduh ïa ki nongïalehkai ha kylleng ki jaka jong ka jylla la ka long ha Shillong, Nongkhrah ha Ribhoi District, bad Alotgre ha Tura, ha kaba u leit ruh ban jurip ïa ki madan ïalehkai, ban syllok bda ki nongïalehkai kumjuh bad ki nongpeit, hynrei ka dei pat ka sien kaba nyngkong ba u lum lang ïa baroh ha kawei ka jaka ban ïa kynduh.
Haba kren halor kane ka sienjam, u President u la pynpaw ïa ka jingdonkam ban don kum kine ki jingïasyllok khamtam haba ïadei hapdeng ki nongïalehkai bad ki bor pynïaid. U la kdew ruh ba ym kumba long ha ki snem ba la dep ba ki nongïalehkai kim ïoh ïa ka lad ban kynduh ïa ki nongïalam ka MCA kumta u ong ba dei na kine ki lympung lada pynlong man ka por ba yn lah ban sngewthuh ïa ki nongïalehkai, ïa ka jingsngew jong ki khnang ba ka Synjuk kan lah ban treikam khambha.
“Ngi dap da ka jingsngewnguh ïa u President ba thymmai jong ngi na ka bynta kane ka sinejam ym kum ha ki por ba la dep ba ngim ïoh ïa ka lad ban pynsngew haba ïadei bad ki rai kiba bun jong ka MCA,” ong u rangïalehkai na ka thup Senior Team.
U ong ruh ba kane ka jingïakynduh bad ka jingïoh lad ban syllok lang ka pynlong ïa ki nongïalehkai ban ïoh mynsiem bad kan ïarap ruh ïa ki bor pynïaid ban lah treikam bha.
Dang ha u bnai ba la dep u President thymmai u la pynlong ruh ïa ka jingïalang pynkup burom ïa ka kynhun ïalehkai U-23 jong ki shynrang hadien ba ki la khur ïa ka nam lahduh ha ka BCCI’s State ODI Trophy ha ka Plate Group.
Na ka liang u President u ai mynsiem ruh ïa ki nongïalehkai ba kin long kiba kloi ban ïa kynduh lane ban thoh ïa u ha kano kano ka por da kaba kular ba un bteng ban ïa kynduh bad ïa syllok.
Kane ka long katkum ka kyrwoh ba la phah da ka ophis treikam jong u President ka Meghalaya Cricket Association, James PK Sangma.
