Khliehriat, K’lyngkot, 03: Da ki phew hajar ngut ki paidabh ki la tuid ban leit peit kai ïa ka shnong Mollamylliang kaba don ha East Jaiñtia Hills District khamtam hadien ba ka shnong ka la pynriam itynnat ia ki sawdong sawkun da ki bording ba thaba laiphew jait bad kiba khring haduh katta katta ia ki khmat jong ki paidbah.
Katkum ka jingiathuh jong u Waheh Shnong u Bah Apmon Pashiang, ha une u snem kiba wan kai sha ka shnong Moolamylliang bun ki dei kiba na Shillong bad kiba nabar jong ka jylla Meghalaya.
Kum ban shu pynkynmaw, ka Dorbar Shnong Moolamylliang ha ki aiom lehkmen kum ha u bnai Nohprah haduh u Kyllalyngkot ka ju rakhe ïa ka Christmas bad pdiang ïa u snem thymmai da ki jingpynthaba ding ha ki rong bapher bapher bad kiba itynnad ha baroh kawei ka shnong bad ïa kane ki ju leh man la u snem bad da ki phew hajar ki briew ki ju wan ban sakhi ïa kane ka tamasa pynthaba ding ha shnong Moolamylliang.
Ha kajuh ka por, kiba wan jngoh ïa ka shnong Moolamylliang ki sakhi ruh ïa ka jingkhuid jong ka shnong ka thaw namarba ka shnong Moolamylliang ka dei kawei na ki shnong kaba la bna nam bha kum kawei na ki shnong kaba khuid hapoh ka jylla Meghalaya bad kaba la ju ioh khur ruh bun bha ki khusnam bapher bapher ha ka jinglah ka Dorbar Shnong ryngkat bad ki nongshong shnong ban pynneh pynsah ïa ka khuid ka suba bad ka jingkup rong jyrngam ka mariang kaba dap da ki dieng ki siej bad ki syntiew ba laiphew jait.
Ïa kane ka tamasa jingpynthaba ding ha baroh kawei ka shnong yn pynkut noh ha ka 5 tarik mynta u bnai bad la pynshongshit ïa kane ka tamasa pynthaba ding ha shnong Moolamylliang da ki jingrwai kum ki Gospel Concert kiba pynsawa ïa ki sur Chrismas kiba bang ba thiang.
Ka Dorbar Shnong lyngba u Waheh Shnong u Bah Apmon Pashiang ka ai ka khublei snem thymmai basuk bakmen ïa baroh kiba la wan poi sha kane ka shnong bad ki ban sa poi ha kine ki sngi kiba dang sah bad kumjuh ruh ïa baroh ki paidbah jong ka jylla ba kin ioh ïa u snem thymmai uba dap da ki jingkyrkhu bad ba kin ioh ïa ka jingkoit jingkhiah da ka jingkyrkhu jong U Blei bad ka shnong ka sngewkmen ban pdiang biang biang kumjuh ïa ki nongwanjngohkai pyrthei kiba najan bad kiba na jngai mynta u snem 2025.
