Shillong, Naitung 30: Ka Tawang Marathon Promotional Run, ka ba la pynlong ha nongbah Shillong, ka la sakhi ïa ka jingwan ïashimbynta shit rhem jong ki nongmareh kiba ieid ïa ka koit ka khiah ki ba la wan ym duna ïa ka 120 ngut ki ba la mareh ha ka jingjngai kaba 5KM. ïa ka ne ka jingmareh la pyniaid da ka jingïatreilang ka sorkarArunachal Pradesh bad ki shipai Indian Army, bad la pyn-urlong ïa ka da ka jingtreishitom ka kynhun CYRUNS, kaba la ioh shisha ïa ka jingiaroh na ki nongïashimbynta halor ka rukom pyniaid bad pynbiang ïa ki jingdonkam baroh.
Kane ka promotional run ne ka jingmareh pyntip paidbah ka long kum shibynta ban pynshlur ïa ki nongmareh ban leit ïashimbynta ha ka Tawang Marathon, ka ban pynlong ha ka 1 tarik u Risaw mynta u snem, kane ka promotional run ka la ktik mynsiem ïa ki ba bun ki nongmareh ban leit ïashimbynta ban pyn-i-pyrthei shuhshuh ïa la ka sap mareh ha ka tei ka jingïakhun mareh marathon ka ban pynlong ha Tawang.
Ka kynhun Run Meghalaya Association ryngkat ki nongïarap ki la trei met bad mynsiem ban pynurlong ïa kane ka jingmareh ha ka jingïalam jong ka kynhun ba kynthup ïa u bah Gerald, u bah Badon, ka samla Dari bad u bah Suting, ïa kane ka program mareh la kyrshan lang ruh da ki Rangbahshnong ka Laitumkhrah, ka tnat police, bad ka DC – Shillong.
La sakhi ïa ka jingshitrhem ki nongïashimbynta ha kane ka jingmareh kiba la pyni shisha ïa ka jingieid jong ki ïa kane ka sport- jingmareh. Ka jingpynsngew ki nongmareh ïa ka jingshem jong ki ïa kane ka promotional run ka la nangpynshlur shuhshuh ïa kiba bun. Bun nakine ki nongmareh ki la pynsngew ïa ka jingthrang jong ki ban poi sha katei ka jingmareh ha Tawang da ka jingthmu ban pynpaw pyrthei ïa ka sap ka phong ba ki don ha kane ka sport.
U Brigadier R. Kapoor jong ka Indian Army, u ba long ruh u kongsan ha kane ka sngi, u la pynher lama sdang ïa kane ka promotional run da ka ba pynshlur bad pynkmen ïa baroh ki nongïashimbynta.
Katba ki sngi ka jingmarehbakongsan ha Tawang ki nangjan, ka jingkmen mynsiem jong ki nongïashimbynta ki ba ap khmihlynti ban ïoh ïamareh lang ban pynpaw pyrthei ïa ka mynsiem jingïatylli lyngba kane ka marathon kaba long ka jingthmu ba hakhmat eh jong ka Tawang Marathon.
