Shillong, Nohprah 21 : Da ki hajar ngut ki paidbah na kylleng ki bynta jong ka East Garo Hills ki la tuid sha ka tamasa Simsang ba arsngi kaba la pynkut noh da ka jingshongkun ha ka 20tarik mynta u bnai ha madan WDSA, Williamnagar.
Ïa kane ka tamasa la wan ban plie ha ka 19tarik da u Myntri ka tnad Soil and Water Conservation, PHE, u Marcuise N Marak ha ryngkat ka jingdonlang u Co-chairman ka Meghalaya State Planning Board, Nihim D Shira, Deputy Commissioner, RP Marak, Superintendent of Police, Bah Stephen Rynjah, ki ophisar na ka distrik bad kiwei kiwei.
Haba kren ha ka jingïalang, u Myntri u la ong ba ka long kaba kongsan haduh katta katta ban pynlong ïa ki tamasa kiba kum kine bad ong ruh ba ki tamasa kiba long ha ka jylla ki plie lad ïa ki riew donsap kum ki nongrwai, ki nongtrei kam lajong bad kiwei kiwei. U la pyntip ruh ba ka kam jngohkai pyrthei ha ka jylla ka la kiew stet bha bad ki khmih lynti ruh ba la kumno kumno ha shwa u 2028 ka jylla kan pdiang palat 1lak ngut ki nongwan kai.
La pynshongkun shuh shuh ïa kane ka tamasa ba ar sngi da ki jingrwai, jingshad, ki jingïalehkai tynrai kum ka An.ding Oka, Wa.pong Sika, ki jingrwai tynrai, Wangala, kiba la pyni da ki samla na ka thain, bad la pynshong shit ruh da ka jingïakob shet jingbam nalor kiwei kiwei.
