Khring ka Me’gong festival ar sngi haduh 55,000 ngut ki riew ieid tamasa ka jylla bad nabar jylla

Shillong, Nohprah 07: Ka Me’gong festival 2025 kaba la sdang ha ka sngi Thohdieng ka la kut noh hapdeng ka jingshongshit ha ka sngi Saitjaiñ ha kaba kane ka tamasa ka la khring ruh ïa palat 55000 ngut ki nongwan shangkai ha kine ki arsngi bad pynskhem ruh ïa ka jingkylla long ka Jylla Meghalaya kum ka jaka ba khlaiñ duh ha ka jingkyntiew ïa ka ïoh ka kot lyngba ki concert ne concert economy ha ka Ri India baroh kawei.
Ha kane ka tamasa kaba don da ka jingïakhleh ki nongput nongtem bad nongrwai ba pawnam ka pyrthei bad napoh ka ri ha ryngkat bad ki riewdon sap ka thaiñ, kane ka tamasa ka la ai ïa kawei na ki rynsan ïaput ïatem, pyni ïa ka kolshor kaba shitrhem bha jong ka thaiñ Shatei Lam Mihngi ka ri. Ha kine ki arsngi na ka liang jong ki nongrwai ba pawnam ki la pynshongshit shibun bha ïa ki paidbah.
La ïathuh ba ha ka sngi ba-ar jong ka tamasa ka la khring bun bha ki paidbah da ka jingkiew rynsan ki nongrwai pop ba pawnam ka Brittain- ka kynhun Blue, ka kynhun Yellow Claw, bad u nongwai bad nongthaw jingrwai ba pawnam Prateek Kuhad bad ka khlur Bollywood Kanika Kapoor, ki la pynlynguh ïa ka madan da ki jingrwai ba pawnam jong ki.
Hadien ka jingrwai u dkhot ka kynhun Blue u Antony Costa ula ïaroh ïa ka jingshongshit jong kane ka tamasa bad ong ba ki paidbah ka Me’gong ki la shongshit bha. U Simon Webbe ula bynrap da kaba ong, “Ka Ri-lum Garo ka dei ka paradise-khublei ïa phi baroh namar kane ka jingwan bad ka jingieid jong phi”.
Katba ka Kanika Kapoor ka la plie ïa kane ka miet ka jingïaput ïatem da ka jingrwai ba pawnam bha jong ka-ka Chittiyaan Kalaiyan, Baby Doll, Jawaani Le Doobi- bad ka la ai khublei ïa ki paidbah ka Meghalaya namar ka jinglong kawei na ki jaka ba sngewtynnad eh na ki jaka ba ka leit rwai ha kiba bun ki jaka.
Na ka liang u Prateek Kuhad ha ryngkat u nongrwai Cold Mess bad Saansein, ki la pynkylla ïa ka madan da ki jingthaba ki light hashuwa ba u Yellow Claw u la pynkut ïa ka miet da ka jingtem electronics kaba la pynkhynñiuh ïa ka madan tamasa ha Bolbokgre-Watregre.
La ong ba ha syndah kane ka rynsan, ka Kingfisher ruh ka la buh ïa ka rynsan ïaput ïatem da ki nongrwai ba pawnam ka thaiñ ba kynthup ïa ka Hoi Hoi Makbil, G-Hill Finest, Crack Gang, Rough Road bad Nokpante.
Ka jingshongshit jong kane ka tamasa ka la sdang naduh ka sngi ba nyngkong da ka jingkiew rynsan u nongrwai ba pawnam ka pyrthei -Richard Marx, Julian Marley, Nucleya bad Neeti Mohan.
U Richard Marx, u la pynshong shit ïa ka tamasa da ki jingrwai ba pawnam jong u kynthup naduh kiba la rim bad kiba thymmai kiba u dang thmu ban pynmih ha ka thup jingrwai ban sa pynlait shen ba ai kyrteng ka Afterhours.
Lah ban pynkynmaw ba ïa kane ka tamasa la plie da u Myntri Rangbah ka Jylla Conrad K Sangma, uba la pyrshang katba lah ban pynlong ïa ka Meghalaya kum ka jaka pdeng ki tamasa ban pyni ïa ka kolshor ki trai Jylla nalor ki concert jong ki nongput nongtem ba pawnam ka pyrthei kum ha ka Me’gong, Shillong Cherry Blossom bad Winter Tales.
Ki nongtem bad nongrwai ba pawnam ka pyrthei kila nang phaikhmat mynta sha ka Meghalaya kum ka jaka ban wan tem ha ka jingwan tour sha India, kaba la pynlong ïa ka Jylla kum kawei na ki jaka ba kwah eh ban wan ha India da ki nongrwai bad nongtem nongput ba pawnam.