Khring ka jingitynnad u lyoh step ka Nongjrong ïa ki paidbah na kylleng

Shillong, Rymphang 04 : Ka shnong Nongjrong kadei kawei ka Shnong hapoh ka Hima Khyriem Raid Mawshai kaba la pawnam bha ha ka thaiñ Mawkynrew na ka jingitynnad jong ka khamtam ha ka por mynstep ba dang mih ka sngi, ka jingdon u lyoh bad na ka jinglah ban pynmih ïa u sohñiamtra.
Ki nongjngohkai pyrthei kiba napoh la ka jong ka Jylla bad nabar ka Jylla ruh kumjuh, haduh mynta mynne ki dang ïai tuid sha katei ka shnong ban leit peit ïa ka jingitynnad jong ka, ha kaba ki don kiba leit ap lypa kiba la poi ha katei ka shnong ha ka por 12 baje, 2 baje mynstep bad kumta ter ter shuwa ban mih ka sngi.
Ki nongshong shnong ka Shnong Nongjrong mynta ki la ïapyrshang ban buh ïa ki homestay hynrei kawei ka jingeh kaba ki ïakynduh kadei na ka jingbym lah ban pynbiang ïa ka umbam umdih ïa ki nongwan jngohkai pyrthei namar tang ka um ba ki ïoh na ka skhim JJM kan ym lah ban pyndap.
U Sordar jong ka Shnong Nongjrong u Bah Pynshaiborlang Synjri, haba ïakren bad u Mawphor u la ïathuh ba 10 snem u la long u Sordar ka Shnong Nongjrong bad watla ha ka jinglong khynnah um da kynmaw mynno la sdang nyngkong ïa ka Shnong, hynrei u la ïathuh ba ka Shnong Nongjrong kadei kawei ka Shnong kaba la rim tam hapoh rilum Khasi.
85 percent ki nongshong shnong jong katei ka shnong kidei ki nongrep ha kaba ka rep kba, sohñiamtra kidei kaba hakhmat tam eh.
U la ïathuh ba ka Shnong mynta ka la nang roi hapoh shnong poh thaw, la ka long ha ka liang ki jaka pule, jaka sumar ka Sub Centre kaba la sdang ban pyntrei, ki lynti syngkien nalor kiwei kiwei na ka jingïoh jingïarap na ki skhim sorkar bapher bapher bad khamtam eh na ka skhim MGNREGS lane ïa kaba la tip paidbah ka bylla 100 sngi.
Shuh shuh u la ïathuh ba ka Nongjrong kadei ka Shnong kaba la ker tawiar da ar tylli ki wah, ka wah Umngot bad wah Umtangphar, hynrei namar ba kadei ka shnong kaba don hajrong u lum, bad ba ka kor tan um ka rit palat ka shem shitom ia ka um ban poi hapoh shnong. Kumta u la buh ka jingkyrpad ia ka sorkar ba kan phaikhmat lem ban ïarap sa kawei pat ka kor tan um kaba kham heh khnang ba kan long ka jingmyntoi ia ki paidbah nong shong Shnong.
U Bah Pynshaiborlang Synjri u la kyrpad ïa ki nongwan jngohkai pyrthei kibym pat tip ba lada ki wan ban peit ïa ka jingitynnad jong ka shnong kim dei than ban ïabeh ban wan ha ki por shiteng miet, 12 baje lane 1 baje hynrei ha ka por 3 ne 4 baje mynstep.
U la buh ïa kane ka jingkyrpad da kaba pynkynmaw ba hadien ba la kut u COVID ki nongwan jngohkai pyrthei ki la ïabeh ban leit sha katei ka shnong bad na ka jingbym pat tip ïa ka jaka, ki la wan ban ap lypa bad poi hapoh shnong ha ka por 12 baje shiteng miet kaba la pynthut ïa ki nongshong Shnong.
Hynrei mynta ki paidbah ki la sdang ban tip kumta u buh ka jingkyrpad ia kiwei pat kibym pat tip ba kim dei ban ïabeh than hynrei lada ki poi ha ka por 3 lane 4 baje ka dang biang palat.
U Sordar u la ïathuh ba ka Shnong Nongjrong ka jngai 52 kilometre na Nongbah Shillong bad ka shim por kumba 2 kynta eiei kumta u la buh ka jingkyrpad ïa ki nongwan jngohkai pyrthei ba kim dei ban da ïabeh than.
Katkum ka jingïathuh u Sordar ba ïa ka jingitynnad jong ka Nongjrong ha ka por mynstep ba dang mih ka sngi bad ka jingdon u lyoh ba rben, lah ban ïohi bha ha u ‘nai Risaw ter ter haduh u ‘nai Lber, hynrei lait noh ha u Kyllalyngkot bad Rymphang ka kham duna.
Ka shnong Nongjrong kaba don ba ka thaiñ Mawkynrew East Khasi Hills District ka la pawnam lyngba uwei u samla na katei ka shnong u samla Misonwell Rangtong uba la post hapoh Instagram ïa ka dur kaba u la shon ha ka por mynstep ba dang mih ka sngi.