Khriak thaba ka Ïewduh naba la sdang ka aïom lehkmen Khrismas, bun kam ki paidbah ban thied ban pet

Shillong Nohprah 17: Hadien ba ka aïom lehkmen Khrismas ka la sdang bad ba ki nongshong shnong kiba dei na ka jingngeit Khristan ki la sdang ïa ki jingpynkhreh pynkhrum, la ïohi ruh ba ka Ïewduh ka la sdang ban phyrnai khriak da ki jingdie ïa ki tiar Khrismas kiba la pynthaba ha kiba bun jait bun rukom.
Ha ka jingleit jurip la ïohi ba naduh ba rung sha Ïewduh na Motphran la ïohi ïa ka jingitynnad jong kane ka jaka rung sha Ïewduh namar la don bun kiba die da ki tiar pynriam Khrismas kiba bun jait bad ha ki rukom bapher bapher.
Katba dang ïaid pat shaduh sha basa die kot kaba dei beit ka ktem kaba manla u snem la ju die beit tang ïa ki tiar Khrismas tang shu la poi kane ka aïom lehkmen Khrismas, ha kane ka basa la ïohi ba la phuh la phieng bha bad ka la phyrnai khriak da ki jingpynthaba ki tiar light kiba bun jait bad ki tiar pynriam Khrismas kiba bun ha la ki jong ki rukom shna bad pynwandur thymmai bad kiba itynnad.
Watla bun na ki nongshong shnong kiba dei na ka jingngeit Khristan ha kine ki Sngi ki dang bunkam ban ïa wad ïa ki jaiñ ki nep, ki juti bad kiwei ki riam ki beit, ha kajuh ka por ruh ki la leit ban ïathied ïa kine ki tiar pynriam Khrismas kiba don bad die ha kane ka basa die kot bad kumjuh ruh sha kiwei pat ki basa ba la die ïa kine ki tiar pynriam Khrismas.
Ka Ïewduh ruh ha kine ki Sngi la ïohi ba ka la sdang ban khapngiah da ka jingwan ki nongshong shnong na nongkyndong sha sor bad khamtam ha Ïewduh ban ïa wan thied ïa ki riam ki beit bad kiwei ki jingdonkam na ka bynta ka jingpynkhreh ïa ka jingrakhe ïa ka sngi Khrismas kaba shisien shisnem kaba dei ka jingleh niam kaba heh duh jong ki Khristan ha ka shisien shisnem.
Lah ruh ban ong ba dei tang ha kane ka aïom khristmas ba ka ïew ka hat hapoh Ïewduh bad kumjuh ruh ha Police Bazar ba ka thnem bha ka jingdie jingthied.