Tura, K’lyngkot 17: Kawei ka jingjia ba sngew shyrkhei ka la jia ha West Garo Hills District ha kaba uwei u briew ula pyniap bad khrai khlieh ïa la ka jong ka Kmie.
Kane ka jingjia kala jia ha ka shnong Chidagre kaba don marjan ka Babadam, bad hap hapoh ka Rongram Police Station, West Garo Hills.
Kat kum ka khubor Pulit, la pyntip ba une u briew ba kyrteng u Sengjon Ch Sangma, 25 snem ka rta, u dei uba don ka jingduna ha ka bor jingmut jingpyrhat bad ula shoh ïa la ka jong ka Kmie kat haduh ba kan iap syndon. La ong ba hadien ba ula pyniap, ula khrai syndon ïa ka khlieh jong ka Kmie ha la ka jong ka ïingsah.
Kane ka Longkmie ba shah pyniap ka kyrteng ka Dijak Ch Sangma ba 45 snem ka rta.
Ki Pulit ki ïathuh ba hadien kane ka kam, u Sengjon ula phet rieh mynta na ki kti jong ka ain.
Ki Pulit kila register case halor kane ka jingjia bad ka jingthwet ïa u Sengjon ka dang ïaid shakhmat.
