SHILLONG, Rymphang 24: Ka East Khasi Hills District Basketball Association (EKHDBA) lyngba ka kyrwoh ka khot bad ïawer ïa ki khynnah samla kynthei bad shynrang kiba hapoh 18 snem sha ka jingpyrshang (trial) ban jied ïa ka kynhun ïalehkai jong ka District.
Kane ka prokram pyrshang jied ïa ka kynhun yn pynlong ar sngi lynter, kaba nyngkong kadei ha ka 27 tarik Rymphang, ha ka por 4 baje janmiet ha Mawlai Mawroh (tang ïa ki Shynrang), bad ha ka 28 tarik Rymphang kan sdang naduh 7 baje mynstep, ha Mawlai Nongpdeng bad kan long na ka bynta baroh Kynthei bad Shynrang.
Kumba la kdew, ha kane ka jingpyrshang yn pdiang tang ïa ki samla lud kiba hapoh 18 snem, kiba kha ha lane hadien ka 01 tarik Kyllalyngkot jong u snem 2008.
La bthah ruh ïa ki khynnah samla kiba kwah ban ïashim bynta ba kin wanrah ryngkat ki kot ki sla ban pynshisha ïa ka snem bad ka jaka sah jong ki, kiba kynthup ïa ka syrnod kha, ka Adhaar Card, 4 tylli ki dur passport nangta ka Residential Certificate (Non-Khasi).
ïa ki phorm lah ban ïoh ha ka 26 tarik Rymphang 2026, bad ki khynnah samla kidei ban thep noh ïa kine ki phorm ha kajuh ka sngi naduh ka por 4 baje janmiet ha Mawlai Mawroh Basketball Court.
Na ka bynta ki jingtip ba kham bñiah phi lah ban phun ha kine ki nombar 9485435263/6009461141. Kane ka long katkum ka kyrwoh ba la phah da u General Secretary ka EKHDBA.
