Khot sngewbha u Lat ka Jylla ïa ka Rifiness ban ïashim bynta ha ka sngi rakhe laitluid ha Raj Bhavan

Shillong, Naitung 16: Kum ka jingithuh ïa ka jingjop ba khraw jong ka bad long ka nuksa na ka bynta ki samla, khamtam eh ïa ki khynnah kynthei, u Lat ka Jylla Meghalaya u C.H.Vijayashankar u la khot sngewbha ïa ka samla Rifiness Warjri ban ïashim bynta lang ha ka jingrakhe ïa ka sngi laitluid ha Raj Bhavan hadien ba u la ïakynduh markhmat bad ka hynne ka sngi Balang (16 tarik, Naitung) ha Raj Bhavan.
“Ka Rifiness ka pynpaw ïa ka mynsiem jong ka jingkut jingmut bad ka jingsngew sarong ïa ka kolshor. Ka jingdon jong ka ha ka prokram rakhe ïa ka sngi laitluid jong Ngi kan long ka jingburom ïa ka jingai mynsiem jong ka ïa ki samla kiba bun ha kylleng ka jylla,” la pynpaw u Lat ka jylla.
Dang shen ka Rifiness ka la pynrung ïa ka kyrteng jong ka ha ka histori kum ka nongkiew lum kaba dang khynnah tam na Meghalaya, ha ka rta ba 20 snem, ban kiew sha kliar ïa u lum Everest, da kaba pyndep ïa kane ka thong ha ka 18 tarik Jymmang, 2025.
U Lat ka Jylla u la ïaroh ïa ka Rifiness kaba la pynsngew da ki ar tylli ki jingrwai – ka jingrwai ieit ri bad ka jingrwai Khasi kaba pynkhih mynsiem – kaba pyni ïa ka jingtip jong ka ïa ka kolshor bad ka jinglah jong ka ban leh bun ki kam nalor ka jingkiew lum.
La kha ïa ka ha Nongthymmai bad ka la heh la san ha Laitkor, bad mynta ka dang pule ïa ka BSc ha ka Botany ha St. Anthony’s College. Hashwa ban leit kiew ïa u lum Everest, ka la kiew ïa u lum Abi Gamin ha u Nailar 2024 hapoh ka jingpeit jong ka NCC. Kadei ka cadet jong ka 61 Meghalaya Girls Battalion NCC, ka la long ka kynthei kaba lai na ka jylla ban poi sha kliar u lum Everest ha ka por kumba 4:45 baje mynstep ha ka 18 tarik u Jymmang, 2025 da kaba bud ïa ki dienjat jong kiwei pat kiba la kynjoh sha kane ka thong ha u snem 2012, 2013, bad 2016.
Wat hapdeng ka jingjop kaba khraw jong ka hynrei ka Rifiness ka dang ïai bteng ban ïarap ïa ka ïing ka sem jong ka ban pynïaid ïa ka dukan sha kaba rit ha rud surok ha Shillong.
Ka ai burom ïa ka jingjop ba ka la ïoh mad sha ka jingkyrshan ba khlaiñ jong ka ïing ka sem bad ka nongrim jong ka NCC.
Da kaba kyntait ban sangeh tang hangne (lum Everest), mynta ka angnud ban jop sa ïa ki hynñiew tylli ki Lum— ki lum kiba jrong tam ha kylleng ki hynñiew tylli ki dewbah – kynthup ïa u lum Denali, Kilimanjaro, bad Vinson Massif. Ha kajuh ka por ka thmu ruh ban pyndep ïa ka jingpule jong ka ha ka Botany.
Ha kane ka sngi u Lat ka Jylla u la pynkup burom ruh ïa ka kynhun ïalehkai Wushu jong ka Boys Sports Company, Assam Regimental Centre (ARC), Shillong.