Khot ki khynnah skul barim ka St. Michael’s HSS Umsning ban snoh kti lang ha jingrakhe dap 60 snem ka skul

Nongpoh, Nailur 20 : Da ka jingkmen ki nongïalam ka St. Michael’s Higher Secondary School Past Pupil’s Association ki la pynpaw ka jingkmen ban tip ba katei ka skul bah kaba long kawei na ka shlem ba ai jingnang jingstad kan kynjoh sha u mawmer ba Hynriewphew snem (Diamond Jubilee) ka jingïaid lynti naduh ba la sui la shor ban pynphriang ïa ka jingnang jingstad ha ka thaiñ Umsning bad ha Ri Bhoi hi baroh kawei.
Ki nongïalam ka St. Michael’s Higher Secondary School Past Pupils Association ha ka jingïalam u Bah Nicky Kharthangmaw kum u President ha ka sngi Saitjaiñ ki la pynlong ïa ka jingïakynduh lang hapoh katei ka skul na ka bynta ban ïa tai bad ïa mir halor ki jingpynkhreh ban rakhe ïa katei ka jingdap 60 snem ka skul ba ha kane ka sngi la don lang ruh kiwei kiwei ki nongïalam kiba la pynpaw ka jingkmen ba kane ka skul kynjoh sha ka jingïaid lynti ba hynriew phew snem ha kaba dang pynïar shuh shuh ïa ka jingshakri na ka bynta ban ai jingnang jingstad ïa ki khun samla ka dong bad ka thaiñ.
Ka St. Michael’s Higher Secondary school kan rakhe ïa kane ka jingdap hynriew phewsnem ha ka 30 tarik u Nailur 2022 ha kaba kala don ka jingpynkhreh pynkhrum ban pynlong ïa kane ka sngi kyrpang ba kan long kaba jop bad kaba phuh ba phieng.
Haba kren sha ki lad pathai khubor, u President ka St. Michael’s Higher Secondary School, Umsning Past Pupil’s Association, u Bah Nicky Kharthangmaw u la ong ba kum ki khynnah skul barim kane ka skul ki dap shisha da ka jingkmen ba kane ka skul ka la kynjoh sha ka jingïaid lynti ba 60 snem bad kum ki nongïalam lane ki khynnah skul barim kim lah khlem da ai burom ba kane ka skul ka la shakri shisha ha kaba kyntiew ïa ka jingnang jingstad hapoh ka thaiñ Umsning bad ha Ri Bhoi hi baroh kawei.
U la ïathuh ruh ba ka Association kala pynkhreh ïaki program ïa kaba la tip kum ka Autumn Fiesta Cum variety show ba kyntup ïaki jingïalehkai bapher bapher naduh jing ïalehkai jong ki khynnah rit, lucky draw bad kiwei kiwei kaba long shi bynta ban ai burom ïa kane ka skul.
Ha kawei ka bynta u la ïathuh ruh ba katei ka Autumn Fiesta cum variety show kan sdang haka 24 tarik Nailur 2022 bad yn pynkut haka 26 tarik Nailur 2022, bad naka liang jong ka Association ka la phah ruh ka jingpyntip ba ïaka tarik ban pynlong ïaka lucky draw kan long haka 26 tarik u Nailur 2022.
Shuh shuh, u la ïathuh ruh ba ka ka jingthmu ka Association ban pynlong ïa katei ka program ka long kum shi bynta ban pynmih pisa naka bynta ban syniang ïaktei ka skul naka bynta ka jingrakhe ïaka Diamond Jubilee.
Shuh shuh, u la bynrap ruh ba ka Association ka khot ka wer ïa baroh ki Past Pupil’s kiba la mih naktei ka shlem ai jingstad ba kynthup naduh ki khun samla bad kiba la Rangbah ba kin wan ban sakhi ha katei ka sngi kyrpang jong ka Skul.