Nongstoiñ, Nailur 26: Ka Sur ki Nongwest ka khot ka wer ïa u paidbah baroh sha ka jingïalang paidbah ka ban pynlong ha ka 28 tarik mynta u bnai, kum shi bynta ban kyntu ïa ki paidbah jong ka thaiñ ban ïanoh synñiang lem kat lah kat ïai ïa u samla rangbah jong ka thaiñ u ba la tip kyrteng kum u Hubert Paliar na ka shnong Mawrok Mawliehbah West Khasi Hills District, u ba long u lahduh ka Ri India ha kaba utei u samla u la ïoh ïa katei ka nam ha ka jingïalehkai Arm Wrestling.
La ong ba katei ka jingkyntu ka dei namar ba utei u samla rangbah u la ïoh ruh ïa ka kabu ban mih khmat ïa ka Ri India ban leit ïakhun ha katei ka juh ka jingïalehkai sha ka Ri Turkey ha u bnai Risaw 2022.
Ka kyrwoh kaba la ai da u samla D.Sun u ba dei u nongaiktien ka Sur ki Nongwest, la ong ba ka sur ki nongwest ka ïawer paidbah ha katei ka sngi, ka dei hadien ba la ïoh jingtip ba utei u samla rangbah u la ïoh ban mihkhmat ïa ka Ri India na ka bynta katei ka jingïalehkai.
Hynrei, namar ka jingbym kot bor haba ïadei bad ka pisa pilaiñ, la hap ban pynsangeh noh bad la duh shisyndon ban leit ban ïashim bynta. Mynta ka kynti pat ka sur ki nongwest ka buh ïa ka thong ban pynurlong ïa ka jingangnud jong utei u samla, namar u la wanrah nam ïa ka thaiñ bad ïa ka jylla hi baroh kawei. La ong shuh ba ïa kum katei ka jingïalang yn pynlong ruh ha Rambrai bad ha Riangdo kata ka long ha ka 29 bad 30 mynta u bnai.
