Shillong, Ïaiong 04: Ka Sorkar Jylla hynne ka sngi nyngkong kala rai ban khot ïa ka Harijan Panchayat Committee (HPC) ha ka taiew ban wan, ban ïakren halor ka jingpynkynriah noh ïa ka Them Metor na Them Iew Mawlong.
“Lada long kumno kumno ruh, ngi lah ban khot ïa ka HPC ha ka taiew ban wan ban ïakren halor kane ka kam” ong u Bah Prestone Tynsong, Symbud Myntri Rangbah ka Jylla haba ïakren bad ki lad pathai khubor.
U Bah Prestone ula pynpaw ruh ba u sngewnguh ïa ka Committee jong ki Harijan ha Iew Mawlong namar lyngba ka mudui jongki ha Ïingkashari Meghalaya High Court, kila pynsngew ïa ka jingkwah ban shong ïakren bad iasyllok bad ka Sorkar Jylla.
“Kila pynpaw ruh da ka jingthoh lyngba ka Ïingkashari ba ka Sorkar ka dei ban ai jaka ïa ki haba pynkynriah hyn rei ïa mynta hi, ngam pat lah ban batai kham bniah ïa kane” ula bynrap.
Kane ka jingkren jong u kala mih hadien ba ka HPC kala pynpaw ba ka dang ap mynta ïa ka Sorkar Jylla ban khot ïakren ïa ki na ka bynta ban ai jaka bujli ha ka jingpynkynriah ïa ka Them Metor na Them Iew Mawlong.
Haba kylli ïa kaei ka jingmut jingpyrkhat jong ka Sorkar halor ka jaka ban ai bujli, u Bah Prestone ula ong “Naduh ka sngi ba nyngkong eh haba ngi shong ïa ka jingïalang jong ka High Level Commitee, ka kyndon ïakren jong ka Committee ka long ban pynkynriah. Ka khyllipmat ba phi kren halor ka jingpynkynriah, ka mut mut ba ka Sorkar ka hap ban ai jaka sah bujli ïa kine ki briew. Hynrei kumba nga ong, ngam pat lah ban batai bniah ïa kane namar ngim pat sngewthuh ïa ka jingmut jingpyrkhat ka HPC tad haduh ba ngin da dep shong jingïalang”.
Ka Ïingkashari haka 9 tarik Lber haba shong bishar ïa ka mukotduma jong ka HPC, kala ong “naba ka nongmudui kala pynpaw ba kwah ban shong ïapynbeit na ka bynta ka jaka ban ai bujli, ïa kaba ka sorkar ruh ka dang shong bishar, la pynjlan noh ïa ka jingshong bishar ïa ka mukotduma kum ka jingailad ban ïapynbeit hapdeng ki ar mamla”.
Lah ban kdew hangne ba ka HLC bala thaw da ka Sorkar Jylla ban wad ïa ki lad ki lynti ha kaban pynkynriah ïa ka Them Metor na Them Iew Mawlong, kala ai jingmut ïa ka Sorkar Jylla ban shimti ïa ka jinglong trai ïa ka jaka ha Them Iew Mawlong na ka Hima Mylliem, ban pynkynriah ïa ki Nongtrei Sorkar bad ban pynkynriah ïa kiba sah be-aiñ.
Ka Sorkar Jylla ha ka 29 tarik Risaw 2021 kala shimti ïa ka jaka ha Them Iew Mawlong hadien ka jingsiew ïa ka pisa ba T. 2 klur sha u Syiem ka Hima Mylliem, kaba long ruh ka sienjam ban pynkynriah ïaka Them Metor.
Na ka liang ka Shillong Muncipal Board kala dep kynriah ïa ka Ophis treikam jong ka sha ka Ophis ba shipor ban plie lynti ïa ka jingpynbha ïa ki Quarter na ka bynta ban ai jaka sah ïala ki nongtrei kiba sah ha Them Metor.
