Jowai, Nailur 11: Shi bynta naka jingpynkhreh ïaka 39th National Game, naka liang ka Jaiñtia Arm Wrestling Association (JAWA) kala pyntip ban kan pynlong ïa ka jingjied ïa ki nongïakhun kti (Right Hand) napoh ka Ri-Lum Jaiñtia kynthup ïa ki shynrang bad ki kynthei ka ban long ha ka 20 tarik u Nailur, 2025.
Ïa kane ka jingjied nongïakhun kti ha Jowai yn pynlong ha Jaiñtia Higher Secondary School, Loomsooïung, Newhill Jowai naduh ka por 8 shiteng mynstep jong ka 20 tarik u Nailur kan don shwa ka jingthew kilo (Weighing) ïa ki nongïalehkai.
Halor kane u Ribaitki Saioo uwei na ki rangïalehkai National Player ula ong ka JAWA kala pynkhreh ïa ki form ïaki nongwan ïashim bynta ha katei ka juh hi ka sngi, da kaba kin wanrah lang ïa kot pynshisha Xerox Copy kum ka School Certificate/ Voter ID/ Aadhaar Card.
Ïa ki Category ban pynïakhun ïa ki shynrang bad kynthei ki long haka Below 50 kg, Below 55 kg, Below 60 kg, Below 65 kg, Below 70 kg, Below 75 kg bad Below 80 kg+. Katba ïa ka bai Entry ka long 200/- tyngka. Na ka bynta kito ki nongjop haka State/National/International yn ym lah ban pdiang ha kane ka jingjied ba pynlong hapoh Jowai.
Kumta la khot sngewbha ïa baroh ki nongshongshnong napoh ka Ri-Lum Jaiñtia ban wan ïashim bynta ha kane ka jingjied nongïakhun kti kata naduh ki skul, College, Club, ki ophis sorkar, ki ophis shimet, ki GYM bad kiwei de. Ïa ki jingtip ba kham bnaih ki lah ban phone ha kine ki no: 8798534494/7005733856/8787492230. La kyntu ruh ban pynrung kyrteng Membership bad ka JAWA.
Ha ka juh ka por la pyntip ba ka Meghalaya Arm Wrestling Association kan pynlong ïa ka juh ka jingjied nongïakhun kti (Both Right & Left Hand) ha Shillong College Basketball Court, ka ban sdang naduh 29 tarik u Nailur haduh 4.10.2025. Na ka liang ka Olivia Dkhar kaba dei ka Vice President jong ka JAWA ka khot sngewbha ïa ki nongïalehkai napoh ka District jong ka Ri-Lum Jaiñtia ba kin leit ïashim bynta sha katei ka lympung. Ka jingthew kilo ïa ki nongïalehkai kan long ha ka 27.09.2025.
Na ka bynta ka jingïakhun jong ka Inter High School/ College (Right Hand) kan long ha ka 29 tarik u Nailur ïa ka (Left Hand) kan long haka 30 tarik u Nailur.
ïa ka Inter Gym kan long haka 1 tarik u Risaw, 2025 haka Right bad Left Hand. Ïa ka Inter Government offices/Private Sector/other kan long haka 2 tarik u Risaw, 2025 haka Right bad Left Hand. Katba ïa ka Inter District kan long haka 3 tarik u Risaw, 2025 naka bynta ka Right Hand bad haka 4 tarik u Risaw ïaka (Left Hand).
