Khot ka Congress ïa ka VPP ban ïatreilang ban pyrshah ïa ka BJP ba shah thombor ki Khristan

0

Shillong, Nailar 11: Ka seng Congress ka la khot ïa ka seng Voice of the People Party (VPP) ban ïatreilang bad ka seng ban kren pyrshah ïa ka jingthombor ka BJP pyrshah ïa ki Khristan bad ki rit paid ha ka ri India.
Ha ka kyrwoh khubor ha ka sngi Nyngkong ka Meghalaya Pradesh Congress Committee (MPCC) ka la ong, “Naba ka VPP bad ka Congress ki ïeng bad ki phla na ka bynta ki hok ki nongshong shnong, ngi khot sngewbha ïa ka VPP ban ïeng lang bad ngi ban kren pyrshah ïa ka BJP ha kaba ïadei bad kine ki kam ba shah thombor ki Khristan bad ki rit paid ha ka ri. Ki paidbah ka jylla Meghalaya ki donkam ban ïenglang kawei ha kaba ïadei bad kine ki jingeh bad ban ïada ïa ka hok synshar paidbah.”
Na ka liang ka seng Congress ka la kyntait ruh ïa ka jingkren u nongaiktien ka VPP u Bah Batskhem Myrboh ha kaba u la ong ba ka seng ka dei kum ki suri ba kup snieh langbrot da kaba ong ba kine ki kam kiba mih na ka por sha ka por ki dei kiba ju jia ha manla ki seng saiñ pyrthei. Ka Congress ka la pynpaw ruh ïa ka jingeh ba mad da ka VPP ba kynthup ïa ka jingshah sospon u Bah Adelbert Nongrum bad ki nongkyrshan.
“U Bah Myrboh u la pynpaw ruh ban pyrshah kam shong tang hapoh Ïingdorbar bad ka lah ruh ban long shabar ka ïing. Kane ka dei ka kam kaba bha hynrei kam dei shuh pat kaba thymmai naba ka Congress ka la leh ïa kine da ki phew snem bad ïa kane ruh la leh lyngba u Rahul Gandhi ba ïalap ban pyrshah ïa ka BJP, bad kynthoh ruh ïa ki kam ka Election Commission. Kane kadei ka kam saiñ pyrthei kaba mih manla ka por kiba hap ban ïakhun ban pynim ïa ka ri India,” bynrap u nongïalam ka Congress.
U la ong ruh ba ka Congress ka ïohi ba ka jingmih noh u Bah Ronnie V. Lyngdoh kan long ka lad ban thaw thymmai biang ïa ka seng bad ban ïoh ki nongïalam kiba thymmai ban trei na ka bynta ka bha ka miat ki nongshong shnong.

Leave A Reply

Your email address will not be published.