Khot jingïalang ka bor district ïa ki shnong, kyntait ka GTF ban shimbynta

Nongpoh, Ïaïong 10: Hadien ka jingpyrshah kaba la mih ha kaba ïadei bad ka jingtei ïa ka 5-Star Resort harud ka pung Umïam ba kynthup ruh ïa ka dewlynnong Lumpongdeng, na ka liang u Abhilash Baranwal, Deputy Commissioner ka Ri-Bhoi mynta ka sngi u la pynshai ba na ka liang ki shnong kim don kano kano ka jingpyrshah ha kaba ïadei bad katei ka project ban kylla dur ïa ka pung Umïam kum kawei na ki jaka jngohkai pyrthei kaba itynnad.
Haba kren sha ki lad pathai khubor mynta ka janmiet na ka liang u DC ka Ri-Bhoi u Abhilash Baranwal u la ong ba ka District Tourism Promotion Society ka la khot jingïalang ïa ki nongïalam shnong na ki shnong ba marjan ha katei ka thaiñ kum ka Umbir, Mawlyndep, Umiam bad kiwei kiwei ryngkat ka MSPCB, MeECL, Tourist Officer ka Ri-Bhoi kumjuh ruh ïaki nongïalam ka Green Tech Foundation kiba la kyntait ban shim bynta ha katei ka jingïalang.
Lyngba katei ka jingïalang la pynshai ruh ha kaba ïadei bad katei ka project sha kitei ki shnong, bad kumjuh ruh ha kaba ïadei bad ki jingtei ha ka dewlynnong Lumpongdeng bad kumno ka jingthmu jong ka sorkar bad ha kaba ïadei bad ka Tender bala pynmih da ka tnad Tourism.
Na ka liang u DC u la pyntip ba katei ka jingïalang kala long kaba seisoh, watla ka jingkyntaid jong ka Green Tech Foundation ban shimbynta hynrei naka liang ki shnong ki kyrshan ïa katei ka project, khamtam ha kaba ïadei bad ka Lumpongdeng Island ha kaba ym don kano kano ka jingtei ka ban neh shir ta hynrei yn pyndonkam da ki tiar kiba lah ban weng ha kano kano ka por.
Shuh shuh ki shnong ruh kila kyrpad ruh ban aikam aijam ïa ki khun samla bad khamtam ka jingmyntoi jong ka shnong lyngba ka jingwan katei ka project.