Khot ïakren ka sorkar ïa ki Doktor MMSA, rai ban sangeh shuwa shipor ïa ki jingïakhih

Shillong,Jylliew 27 : Mynta ka janmiet ka sorkar lyngba ka Secretary ka tnad ka kong ka khiah I Kong R.M Kurbah I la khot ïakren ïa ki doktor jongka Meghalaya Medical Service Association (MMSA) bad hadien ba la kular ban shim khia halor ki mat jingdawa jong ki, na ka liang ki nongïalam ka MMSA ki la rai ban pynsangeh shwa shipor ïa ki jingïakhih jongki.
Haba ïakren bad I President jongka MMSA I Dr Y Phira i la ïathuh “ I Secretary ka tnad ka koit ka khiah I Kong R.M Kurbah i la khot ïakren ïa ngi mynta ka janmiet bad hadien ba ngi la ïakren bad I la kular ban shim khia halor ki mat jingdawa jong ka MMSA kumta ngi la rai ban pynsangeh shwa shipor ïa ki jingiakhih jong ngi bad ngi kyrmen ruh ba ka sorkar kan bat ïa ka kular ban pynshitom kat kum ki kyndon aiñ ïa ki nongpynïaid jongka Indian Institute of Public Health (IIPH) kiba la kynnoh khlem nongrim bad shu pynjah burom ïa u DHS (MI) Dr Aman War ha ki katto katne ki lad pathai khubor namar kane ka ktah ïa ki kum ki doktor baroh ba u dei u khlieh duh jongki”.
Ha ka jingshisha hynnin ka sngi ka MMSA ka la rai ba baroh ki doktor ha ka jylla kin sangeh treikam 24 kynta lynter kla ban sdang naduh lashai ka 28 tarik naduh ka por 9 baje mynstep namar ka jingbym shim khia jongka sorkar halor ki jingdawa jong ki. Kaba nyngkong ka long ban pynshitom kat kum ki kyndon aiñ ïa ki bor pynïaid ka IIPH kiba kynnoh khlem nongrim bad pynjah burom ïa u DHS(MI) Kaba ar ka long ban weng noh ïa ka IIPH na katei ka jaka ba don ka ophis Dy Director jongka Malaria kaba dei kato kaba don ka NEIGRIHMS mynshwa hajan Pasteur Institute, Lawmali bad kumjuh ruh ban thung jingtohkit. Kumjuh ruh ban bishar bniah biang ïaka MoU ba la ïasoi bad ka Public Health Foundation of India (PHFI). Ka jingdawa ban thung jingtohkit ka long ruh ban tohkit wat ïa u Principal Secretary ka tnad ka koit ka khiah u Sampath Kumar namar ha kano ka nongrim u ïashah ïa ki nongpyniaid ka IIPH khlem da ailad ïa u DHS (MI) ba un pynshai ne pan jingpynshai shwa na u DHS (MI) shwa ba un shim ïa kano kano ka rai.
Kumjuh ruh na ka liang u Myntri Rangbah ha ka jingïakynduh bad ki lad pathai khubor ula dep ai ka jingkular ban khot ïakren ia ki nongïalam ka MMSA khnang ban lait na kino kino ki jingïakhih ki ban ktah ïaki paidbah. Kumta kumba u la kular, hadien ba la wai hi ka jingïalang ka Kynhun Myntri, I Secretary i la khot noh ïa ki nongïalam ka MMSA bad hadien ba i la kular ban shim khia halor kitei ki mat jingdawa jongki doktor hapoh ka lama MMSA kumta ki la rai ban pynsangeh shwa shipor ïa ki jingïakhih ban ap ïa ki jingkular la ka sorkar ka pyntreikam ne em ïaki.
Lada jia ba ka sorkar kam leh ei ei halor kine ki jingdawa ki doktor hapoh ka lama MMSA kin sa shim da ki lad jingïakhih kiba tyngeh shuh shuh.