Shillong, Risaw 15: U Deputy Commissioner jong ka South Garo Hills u Richard Yanthan u la pynshai ba ka jingkhot hajir jong ki bor synshar distrik ïa u YouTuber uba la tip kyrteng kum u Tatu Marak kam dei satia ka jingthmu ban khniot ïa ka sur jong ki nongpathai jingtip shimet.
Ha kaba ïadei bad ka jingpyllait khubor dang shen na ka liang jong ka Garo Hills Press and Media Association (GHMPA) ka la pynrem jur halor ka jingkynnoh ba ka don ka jingtuklar jong ki bor synshar ka South Garo Hills District ïa ka jingtreikam jong ki lad pathai khubor laitluid.
Halor ka jingkhot hajir ïa u YouTuber, u Tatu Marak, ka long ban pan jingpynshai halor ka jingpyllait ïa ka khubor ba dang shen shaphang ki lanot shlei um kiba la shah ktah hapoh ka Chokpot C&RD block, South Garo Hills District.
Katkum u kyrwoh na u Deputy Commissioner, u la ong, u Tatu Marak u la pynmih ïa ka khubor kaba long tang na kawei ka liang da kaba leit kren ïa ki lanot ba la shah ktah hynrei um shym la pan jingpynshai na ki ophisar sorkar lymne na ki bor synshar distrik ban pynthikna halor ka jingkren na ki paidbah ba la shah shim jingkren.
Ïa ka jingkren ba la ai da ki paidbah la thep ha ka YouTube channel ‘NEIG NEWS’, ka dei ka bym shym la pynpaw ïa ka jingtrei shitom kumba ka paw bad ka long kum ka jingpynduh mynsiem ïa ka jingtrei shitom jong ka Sorkar bad ka jingtrei shitom jong ki bor synshar distrik ha ka khep ba wan ki jinglynshop na ka mariang.
“La pynkynmaw biang hangne ba ka jingleh jong ki bor synshar ka South Garo Hills District ha kaba khot hajir ïa u Tatu Marak kam dei ban pynjah ïa ka sur jong ki lad pathai khubor laitluid, hynrei, da kaba bud ïa ki nongrim jong ka hok longbriew manbriew, la ailad ïa u Tatu Marak ban pynshai shuh shuh halor ki jingleh jong u, kaba ha kata ka por ka la wanrah ïa ka jingeh bad jingkulmar jingmut ha kaba ïadei bad ki lad ai jingïarap kiba dang ïaid shakhmat bad ka jingpynduh mynsiem ïa ka jinglen lade jong ki nongtrei,” la ong shuh shuh u DC.
