Shillong, Nailar, 11: U nongïalam jong ka, Ka Sur ka Bri u Hynñiewtrep, u Bah Donbok Kharlyngdoh ha ka sngi Palei u la shah khot hajir ha ki Pulit ka Mawlai Police Station halor ka jingkynnoh ba kane ka kynhun ka la pynsaphriang ïa ka jingpynbna ha ka rynsan jong ka Social Media da kaba kyrpad ïa ki paidbah nongshong shnong ka rilum Khasi bad Jaiñtia ban wah da ki lama iong ha ka jaka jong ka lama India.
Ha kane ka jingthoh ba la saphriang ha ka Social Media, Ka Sur ka Bri u Hynñiewtrep ka la ong, “ka kynhun ka kyrpad ba ha ka jaka jong ka Har Ghar Tiranga naduh ka 13-15 tarik, August ban wah lama India ha ki iing, kumba la pynbna da ka Sorkar. U paidbah ka Ri, ha kitei ki sngi, u dei ban wah da ki lama iong ha ki ing ki kali, ki ar shaka, kum ka dak ba ngi pyrshah sorkar pynïap briew, namara kam pat shym la lah ban pynshitom, ban weng kam ïa kita ki nongpynïap briew kiba la dkhat jubor ïa ka jingim jong u Bah Cherishtarfield Thangkhiew.”
Ïa u Bah Donbok Kharlyngdoh, la synran lang da ki nongïalam jong ka, Ka Sur ka Bri u Hynñiewtrep ha kane ka jingleit shah hajir hakhmat ki Pulit ka Mawlai Police Station.
“Ka Kynhun kam pyrshah sorkar India, hynrei ka pyrshah sorkar MDA namar la shisnem kynthih kam pat don ka jingmih kaba pynhun ïa u paidbah. Ai ba ngin ïohi shwa ïa ki Nongpynïap briew ha ki uniform kin shah pynshitom katkum ki kam jong ki, lehse ha kiwei pat ki snem, ngin sa wah kita ki Lama India, lada ngi ïohi ba ka hok ka ieng rasong,” la pynpaw kane ka jingthoh ba la pynsaphriang ha ka Social Media.
Ha ka jingïakren bad ki lad pathai khubor hadien ba la mih na thanat, u Bah Donbok Kharlyngdoh u la ong ba ka KSKBuH kam pynbor ïano ïano ruh ban ym wah ïa ki Lama India ne lama iong hynrei ka long tang ka jingkyrpad ïa ki paidbah na ka liang jong kane ka kynhun.
“Ki don kiba la pyrshang ban pynjah ïa ka jingthmu da kaba ba ngi la shu pynbor ïa ki paidbah ban ym buh ïa ka lama jong ka ri India ha ki tarik ba la kdew,” u la ong bad bynrap, ‘ngi la pynshai ba ngim kwah ban pynïadei eiei ïa ka jingdawa jong ngi na ka bynta ka jingbishar ba hok ïa u Bah Cheristarfield Thangkhiew bad ka jingrakhe sngi laitluid ka ri hapoh ka jylla.”
“Ngi kyrpad ïa ki Pulit ba kim dei ban ïa khleh lang bad ïa ar tylli ki prokram ki ban long naduh ka 13 tarik, Nailar, namarba ka dei ka lyngkhuh sngi ïap jong u Bah Thangkiew bad ka 15 tarik, Nailar ka dei ka jingrakhe ïa ka Independence Day,” u la ong.
“Ngi ieh beit ha ka mon u paidbah la ki kwah ban buh ïa ki lama iong lane ki kwah ban buh ïa ka lama India, kata ka shong ha ki,” ula ong.
Dang shen ka KSKBuH ka la tur paidbah sha Main Secretariat ban dawa sei madan ïa ka kaiphod tohkit jong u Nongbishar ba la shongthait u Justice T. Vaiphei uba la shah pynkhamti ban tohkit halor ka jingshah siat ïap jong u Bah Cherishtarfield Thangkhiew ha ka jingleit khynra jong ki Pulit ïa ka ingsah jong u ha Mawlai Kynton Massar ha ka step synñia jong ka 13 tarik u Nailar, 2021.
Ha ka jingïakren bad u Symbud Myntri Rangbah la pyntip sha ki nongïalam jong ka KSKBuH ba ka Sorkar kan sa rah shwa ha Iingdorbar Thawaiñ ka Jylla ha ka 9 tarik, Nailur, 2022.
Ka Sorkar ka la pynmih ïa ka jingpynbna ba kyrpad ïa ki paidbah nongshong shnong jong ka jylla Meghalaya ban ïasnohkti lang bad ka ri India baroh kawei da kaba wah ïa ka Lama lai rong jong ka ri ha la ki ing ki snem naduh ka 13 tarik haduh ka 15 tarik mynta u bnai ha ka jingrakhe ïa ka sngi laitluid kaba 75 snem jong ka ri India.
