Khot hajir ka ïingbishar HC ïa u DC bad SP ka East Jaintia Hills hukum ban ai kaiphod bniah hapoh 10 sngi

Shillong, Rymphang 9 : Ka ïing Bishar High Court jongka jylla ka la khot hajir ïa u Deputy Commissioner (DC) bad u Superintendent of Police (SP) jongka East Jaintia Hills ba kin wan mih da lade hakhmat ka ïing Bishar, kaba la shim suo motu case halor ka jingbthei ka par tih dewiong beaiñ ha Mynsngat-Thangsko, East Jaintia Hills, kaba la shim ïa ki mynsiem ki 27 ngut ki nongbylla tih dewiong.
Ym tang katta ka ïing Bishar High Court ka la hukum ruh ïa u DC bad SP ka East Jaintia Hills ba kin pynkhreh ïa ka kaiphod kaba bniah bad wanrah hakhmat ka ïing bishar hapoh shiphew sngi. Ha kane ka kaiphod la hukum ban pynpaw kiei ki kam ba la leh ban khang ïa ka jingtih dewiong beaiñ, katno u dewiong la ïoh kurup, katno ngut la kem bad kiei ki lad ki lynti ban shim ban pynduh pyndap ïa ka jingtih dewiong beaiñ hadien ba la jia ka jingbthei bom ha Mynsngat- Thangsko kaba la wanrah ka jingiap ïa 27 ngut ki briew bad mynsaw 9 ngut kaba la jia ha ka 5 tarik mynta u bnai.
Haba kren bad ki lad pathai khubor, u Superintendent of Police Vikash Kumar ula iathuh ba ka ïing Bishar High Court ka la shim mukotduma ïa kane ka jingjia bad ka la bthah ïa u DC bad SP jong ka District ba kin wan mih dalade ha ïing Bishar.
U Myntri Rangbah ka Jylla Conrad K Sangma ha ka sngi Nyngkong, ula pynbna ïa ka rai jong ka Sorkar Jylla ban thung ïa ka Judicial Inquiry Commission hapoh ka Commission of Inquiry Act, ban tohkit ïa kane ka jingjia.
Arngut ki trai par, u Forme Chyrmang (36) bad u Shamehi War (42), ki la shah kem bad shah set ha ka police custody ba lai sngi.
“Haba ïadei bad ka jingpynbthei bomb ha ka par dewiong beaiñ ba jia ha ka 5 tarik Rymphang, ka ïing Bishar ka la shim mukotduma bad khot ïa u DC bad SP ka EJH ban wan mih da lade ha ïing Bishar. Namar kane ka kam ka dang don hapdeng ka jingbishar ka ïing Bishar , ngim lah ban kynthoh eiei palat ïa kane ha kane ka khyllipmat” ong u Kumar.
Hynrei ula pyntip ba ka jingtohkit ka dang ïaid shaid shaid hapoh ki kyndon jong ka Aiñ.
“Ka jingtohkit ka dang ïaid shaid shaid. Ngi la kem briew bad ka jingtohkit ka la ïaid ha ka lynti kaba dei. Ngi ngeit skhem ba yn sa wanrah ïa ka sha ka jingkut kaba thikna,” u la pynpaw.
Haba ïadei bad ka jingïaid ka jingbishar ka ïing Bishar, u Kumar ula pyntip ba ïa ka sien leit hajir biang kan sa shai hadien ba ka ïing Bishar ka la pynmih ïa ka hukum. “Ngi khmih lynti ïa ka hukum ban mih mynta ka janmiet. Tad hadien kata ngin sa lah ban pynthikna ïa ka sngi ban leit hajir biang” ula bynrap.
Haba kyntait ïa ki jingïakren ba ki jingpyrshang ban wad ïa ki briew ka la ïaid suki, u SP ula pynthikna ba ka jingïawad briew ka dang bteng wat hapdeng ki jingeh kiba bun.
“Ka jingwad ïa ki briew ka dang ïaid shakhmat. Ka jingwad hynnin ka sngi ruh ka la ïaid, watla ym shym la lap shuh ïa ki met. Ka jingïawad kan dang bteng mynta ka sngi” ula ong.
Haba ïadei bad ka jingneh ka jingïawad ïa ki briew, u SP ula ong ba kane kan shong ha ki jingaiktien na ki agency kiba don bynta kynthup ka National Disaster Response Force (NDRF), State Disaster Response Force (SDRF), bad kiwei ki kynhun ai jingïarap, haba buh hakhmat ïa ki jingeh ha ka jinglong ki jaka bad ka jinglong jingman ha katei ka par.