Khot hajir ka Assembly Committee ïa u DGP bad IO halor ka jingshah pyniap ki 2 ngut shipara

Shillong, Jylliew 8 : Ka Assembly Committee on Women Empowerment ka la khot hajir ïa u Director General of Police (DGP) bad ïa u Investigating Officer (IO) ha ka 20 tarik Jylliew halor ka jingshah pyniap ki arngut shipara ki khynnah rit iwei ba dang 4 snem bad iwei ba dang 2 snem ba la jia ha ka janmiet 30 tarik Jymmang 2022 ha Nongrah.
“ Nga la khot hajir ïa u DGP bad ïa u IO kynthup ïa u OC halor kane ka jingjia. ïa ka shithi ngi la phah mynta ka sngi” ïathuh ka Chairperson jongka Committee on Power Empowerment I kong Ampareen Lyngdoh.
ïa kitei baroh lai ngut la bthah ba kin wan mih hakhmat ka Committee ha ka 20 tarik mynta u bnai Jylliew. Ka Chairperson jongka Committee ka la khot hajir ruh ïaka Chairperson jongka State Commission for Protection of Child Rights.
ïa u kpa runar u Jefferson Jana la kem da ki pulit ha ka miet 31 tarik hadien ba u la wan phai sha ïing na ka jingphet rieh kata hadien ba kiba haïing bad ka shnong kila lap ïa ki met iap jong ki arngut shipara na lawbniap Wahktieh ha Nongrah. Haduh mynta une u runar u dang don beit ha byndi ki pulit.
La pynngat ïa u ha ki kyndon aiñ rahbor bad pyniap briew section 364 bad 302 IPC. Ha ka jingtohkit ula phla ruh ha ki pulit ba udei ma u uba leh ïa ka kam pyniap ïa la ki jong ki khun da kaba shu siah ïaki da ka tari na pdot. U la phla ba u la leh ïa kane ban pynhiar kput namar ba ka kurim kam kwah shuh ban dang ïashong iasah bad u hadien ba la leit buh ïa u sha Rehabilitation Centre. U dang shu mih dang shen na katei ka centre bad leh ïa kane ka kam pynhiar kput ha ki khun.